Pajau Media
12 March 2025
Jinghpaw mungdaw KIO ginjaw nga ai Laiza muklum makau hta Myen hpyen dap kawn suicide drone hte dai hpawt jau hkying 2 aten hta sa htim gasat ai lam hpe Laiza kaw nga ai ginra masha langai tsun ai kawn chye lu ai.
“Dai hpawt hkying 2 hkan re, nta pa gara mat ai. Sa gasat ai shara hte gade ram hkra sawng ai hpe gaw nchye ai,” nga nna tsun ai.
Gasat wa ai hte seng nna mani mana yup tung aten hkan hta mung drone ni pyen taw nga ai hpe ginra masha langai bai matut tsun ai.
“Duty ang ai masha nkau mi tsun ai gaw mani kaw na drone ni grai pyen taw nga ai da,” nga nna ginra masha langai mi bai kahtap tsun ai.
Myen hpyen dap ni gaw Manmaw kaw nga ai S.K.Hk (21) dap npu na dap kaji nkau hpe tat sum kau ra ai a majaw ya na zawn sa htim gasat ai re lam maram lu ai re hte January shata hta mung hprigang dap hte amyawk dap ni hpe tat sum kau ai hpang si hkam drone ni hte htim gasat wa ai lam hpe chye lu ai.
Maga mi hta mung Manmaw majan matut manoi laja nga ai rai nna rawt malan hpung ni kawn S.K.Hk (21) dap du hkra htu gasat nga ai re hte Myen hpyen dap ni a dap shara nakau hte drone ni hpe mung lu gap jahkrat ai lam chye lu ai.
Shiga - Zau
Comments