Laiza-Mai Ja Yang Hkrun Lam Hten Ai Majaw Hkrun Lam Yak Hkak Ai Lam Mawdaw La Ni Tsun Ai

Pajau Media Channel

7th August, 2024

KIO uphkang ginra Laiza-Mai Ja Yang madung hkawm sa hkrun lam gaw marang htu sawng ai majaw hkrun lam hten nna yak yak hkak hkak rai hkawm sa ra ai lam mawdaw la ni tsun nga ma ai re.

Laiza-Mai Ja Yang hkrun lam gaw lai wa sai July shata daram kaw nna marang htu sawng ai majaw ninggam gyi, lam ga ai majaw lai wa lai sa grai yak hkak nga ai re nga nna ginra masha tsun ai hta, “Moi gaw Laiza-Mai Ja Yang hkrun lam gaw jahpawt jau sa yang Mai Ja Yang de grai jau du ai. Ya gaw hkrun lam yak ai hte lam gyi ai ni a majaw shana she du ai aten mung nga ai.”

Law malawng hten mat ai gaw Laiza kaw na Dum Bung hpyen yen sa lam hte Mai Ja Yang n du shi ai Nhkawng Pa hpyen yen dabang du hkra lam hten ai hte grau yak hkak ai lam chye lu ai. Hkawm sa hkrun lam hte seng nna ginra masha ni gaw lit nga ai asuya kaw nna atsawm lit la gram lajang na hpe ra sharawng nga ma ai raitim ya aten du hkra gram lajang ya ai lam n nga, yak yak hkak hkak rai hkawm sa ra ai lam chye lu ai.