Pajau Media
4 February 2025
Jinghpaw mungdaw Waingmaw muklum Labang kahtawng kaw nga ai hpyenyen dabang shara hta shanhpyi ana sumbram byin nga nna ndai laman grai sawng wa ai re hte makaji ni hta sha n-ga masha kaba ni hkna mung kap bra ana byin taw nga ai hpe hpyenyen masha ni kawn chye lu ai.
Dai hpyenyen ginra na ma ni yawng ngu na daram byin nga ai raitim tsi tsi na matu tsi taw ai mayak a majaw shanhpyi ana sumbram kap bra ai hta ma chya ngai ni kaw na hkawt masha kaba ni kaw du hkra kap bra wa ai re nga nna tsun ai.
“Ma ni yawng ngu na daram byin ai. Chya ya na tsi nnga na ma ni a matu grai yak ai. Dai ana byin ai ma ni lawan nmai ai majaw anhte masha kaba ni kaw du hkra byin wa ai,” nga nna hpyenyen amyu shayi langai tsun ai re.
Hpyenyen ladaw hta kap bra ana byin ai gaw hka san atsawm nlu ai a majaw hta sha n-ga lu sha hte hkumhkrang jasan jaseng lam ni hta gawngkya ai a majaw byin chye ai hpe Waingmaw mung shawa tsirung tsi magam gun saranum langai tsun ai.
“Hpyenyen shara re ai majaw masha gaw law na san seng lam kaw gawngkya ai majaw kap bra lawan ai. Ngut na ma ni gaw law ai hte htaw jum nang jum gasup na lata gaw atsawm bai nkashin na langai kawn langai kap bra ai re,” nga nna tsirung magam gun saranum langai tsun ai.
Sumbram kap bra ana byin taw ai ni gaw laning mi npu ma ni hte chyu naw chyu ai ma asak pang ni hta grau law byin nna lawan nmat ai hta sha n-ga ndai laman masha kaba ni kaw du hkra kap bra sawng wa ai nga nna tsun ai.
Ya yang hpyenyen mung masha ni gaw seng ang ai uhpung uhpawng ni kaw na karum madi lu taw ai raitim tsi ni gugu rara nlu ai hta shingra tara galai ai a majaw machyi makaw jahkring hkring byin nga nna sumbram kap bra ana bying ai mung shata 5 ram na wa sai re hpe chye lu ai.
Shiga-Hpring
Comments