Pajau Media Channel
17th May, 2024
Waimaw ginra Mali hka mayan Nawng Hkying Laban kahtawng mare kaw koi yen nga ai hpyen yen mung masha ni hta hpaji sharin ra ai jawng ma ni law nga ai re hte jawng hpaw ten gaw du wa hpaji matut sharin sa wa na matu yak hkak nga ai ni nga ai re nga nna labang kahtawng kaw koi yen nga ai dabang lit nga masha tsun ai.
Labang Kahtawng kaw Jawng lung ram ai Jawng ma 2,000 jan daram nga ai re hte asuya jawng hta lung nga ai jawng ma ni gaw tinang koi yen nga ai shara hkan na asuya jawng ni hkan mai lung ai raitim shara n law ai hte jawng ma hkap la ai lam hta masat nna hkap la ai re majaw yak hkak nga ai masa re lam chye lu ai.
“ Nawku Hpung mahta ai jawng ni hkan lung ai ma ni gaw n dai kaw du yang shante lung na jawng n nga ai, ya anhte koi yen ai shara kaw gaw tsang manga du hkra hpaw ai jawng gaw nga ai, jawng ma hkap la ai lam hta masat da ai shadang hte hkap la nga ai re majaw anhte a ma ni hpe n hkap la ai, n dai kaw jawng hpaw lu hkra shara hpyi da ai, shara gaw lu sai, raitim kaga ra kadawn ai lam ni, jawng lang rung rai ni kaw na hkawt sharin sara ni kaw na hkawt grai ra kadawn nga ai re” nga nna dabang lit hkam tsun ai re.
Nawku makam masham mahta ai jawng hkan lung ai jawng ma ni hpaji matut sharin hkam la lu na matu jawng hpaw sa wa na masing hte seng nna mare kata nga ai Nawku Hpung ni kaw nna shara lajang da ya ai raitim kaga ra kadawn ai jawng lang arung rai ni hte sharin sara, saranum ni mung ra kadawn nga ai, nawku Hpung mahta ai jawng kaw sharin hkam la na jawng ma ni gaw marai 50 grup yin nga ai re hpe mung chye lu ai.
Tsang (10,11,12) Lung na Jawng ma ni mung kaga ginra de sa lung ra ai re hte nga border nga manu ni sen (30,40) du hkra manu nga ai re majaw ya aten na hpyen koi yen nga ai masa hta n lu lung ai re nga nna mung dabang lit hkam tsun ai re. Laban Kahtawng kaw koi yen nga ai mung masha ni gaw lai wa sai march (7) ya kaw nna hpang ai htu shadut majan a majaw chyat rawng mat ai Awng Mye (1,2) hte Shwe Nyawng Pin mare kaw nna koi yen wa ai mung masha ni re hte htinggaw (132), masha yawng rai yang (1000) mi jan nga ai re hpe mung chye lu ai.
Comments