Kumshu Dan Dut Aten Lai Wa Tim Dan Shangut La Na Matu Yak Hkak Nga Ai Lam

Pajau Media

3/17/2025

Man Je ginra hte Manwin ginra masha ni gaw kumshu hpe madung shang gumhpraw langai hku nna galaw sha ai hta dai ning laman gaw kumshu bai hkai na aten du wa tim kumshu dan shangut la na matu yak hkak nga ai lam ginra masha ni tsun ai.

Shawoi shaning hkan gaw n dai laman hta kumshu ni hpe dan la ngut sai re hte dai ning gaw kumshu bai hkai aten du wa tim kumshu dan dut sha na matu yak hkak nga ai masa hpe ginra masha ni tsun dan ai re.

“dai ning gaw shawoi shaning na zawn yawng dan la nna Miwa de htaw shalai dut sha n mai mat ai masa re, kumshu sun langai kaw na mawdaw langai sha mai shaw shalai, dai hpe pyi kumshu sun madu ni gaw ra lata mye manaw nna she tinang shaw dut na aten hpe la nna she galaw la ra ai majaw kumshu dan la na matu yak hak ai re” nga nna ginra masha langai tsun da ai re.

Maning dai ning kaw nna miwa jarit mayan kumshu sun galaw sha ai ni kumshu htaw shalai dut sha na matu grai yak hkak wa ai re hte miwa maga kawn mung kumshu mari ai lam hpe shadawn shadang hte sha mari mat ai majaw re lam chye lu ai.

Jarit mayan kumshu hkai shadut ai mung masha ni gaw sun galaw na matu Nam hpun buk ni hpe Miwa de na hkoi la n htawm kumshu dan la ten she bai wa ai ladat hte galaw nga ma ai re. Raitim dai ning gaw ya aten du hkra kumshu n lu dan ai majaw hkoi da ai Namhpun manu pyi n lu wa ai mayak ni hte hkrum katut nga ma ai re.

Manwin ginra nga ai mung masha ni gaw Kumshu sun hpe shaning na na shang gumhpraw hpaga langai hku nna galaw sha wa ai raitim kumshu dut mari ai lam ni gaw laning hte laning grai yawm wa ai majaw kumshu sun matut galaw na n galaw na hpe Ginra masha ni grai myit yak nga ma ai lam chye lu ai.

N dai masa hta ginra mung masha n kau gaw Kumshu hkai ai shara kaw hkauna mam hpe bai hkai shadut ai lam ni nga wa sai lam ginra masha ni tsun dan ai kaw na chye lu ai.

Shiga - ZauMai