Pajau Media
22.1.2025
Jinghpaw Mung Mohnyin ginra Nyawng Pin Kung ginra Myai Mare mayan kaw KPDF hte Myen hpyen dap lapran gasat gala byin ai hpang Myen hpyen dap kawn Lak nak kaba ni gap shadam ai majaw ginra masha ni shimlum lam a matu grai myit tsang nga ma ai lam chye lu ai.
“Gasat Gala byin ai hpang Myen hpyen dap, Sam Hkyeng P.T.Ts pawng hpawm N-gun 50 grup yin lawm ai hpung ni gaw hpyen n-gun jat nga dingyang re, shahte shamu shamawt ai hpang kaw nna Nam Ma Amyawk dap kaw nna Lak nak kaba matut manoi gap ai, shana tup tup mung gap ai, hkring dat bai gap dat, dum nta ntsa hkan wa hkrat na tsang ai majaw shana mung n gwi yup ai” Thandapin ginra masha langai tsun ai re.
Lai wa sai bat laman hta Mung Mohnyin ginra makau kaw gasat gala majan byin ai hpang Namma Amyawk Dap kaw nna Lak nak kaba matut manoi gap bun nga ai re hte Thandapin Mare mayan de PDF hpung ni shamu shamawt ai lam shiga na ai majaw Myen hpyen dap kawn Thantapin hkawm sa hkrun lam ni mung pat kau ai re nga nna ginra masha ni tsun ai kaw na chye lu ai.
Dai sha n-ga Mohnyin ginra kata Myen hpyen dap hte sam Hkyeng P.T.Ts ni gaw shana aten sinat gap shadam ai lam ni galaw nga ai hte Hkying 7: 00 PM hpang daw hta hpyen lahkawn na matu hkyen ai lam shiga ni mung mawng nga ai lam ginra masha ni tsun ai re.
January 12 ya shani hta Mung lak nak gap shadam ai majaw Aliwekung lawk Lam makau mung masha dum nta kaw wa hkrat kapaw nna asak 3 ning re ai Ma langai hkala hkrum ai hte dum nta hten za ai lam nga sai re hpe mung chye lu ai.
Shiga- Kachin Pyi Tar
Comments