Pajau Media
25.11.2024
KIA pawng hpawm hpung ni zing madu da ai ginra ni hpe Myen hpyen dap gaw Jet nbungli ni hte bawm wa jahkrat ai lam ni galaw nga ai majaw ya aten Nmawk ginra kata KIO uphkang n pu hta hpaw shabawn da ai Jawng ni hpe aten n masat pat da ai lam ginra masha ni kaw na chye lu ai.
Nmawk, Myotit Kung Law ginra hta lai wa sai November 15 ya shana daw aten Myen hpyen dap kawn Jet nbungli hte bawm wa jahkrat ai majaw asak kaji ai ma marai 7 hte rai yang marai 9 asak si sum nna Mung masha 30 hkawt hkala hkrum ai mabyin hpang November 18 ya kaw nna KIO uphkang n pu na Jawng ni hpe aten n masat pat kau sai re lam chye lu ai.
Jet nbungli bawm wa jahkrat ai aten asak si sum mat ai hta Nam Ting mare kaw na lawu tsang sharin sara num hte Jawng ma ni lawm mat ai re. Ndai mabyin a majaw Jawng ma kanu kawa ni gaw Ma ni hpe jawng nsa sha ngun mat ai hte Jawng hpe December praw de bai hpaw sa wa na lam tsun ai raitim dai ten hta lu hpaw na n hpaw na atsawm n chye lu ai lam ginra masha ni tsun nga ma ai re.
KIA pawng hpawm hpyen hpung ni March 7 ya kawn hpang ai htu shadut majan hta Manmaw hkrun lam ntsa nga ai mare kahtawng ni yawng hpe zing madu la ai hpang KIO uphkang n pu hpaw sharin nga ai Myotit Kung Law, Man Nawng, Si Hat, Num Lang hte Nam Ding mare ni hkan na hpaji jawng ni hpe gan pat da ai re.
Ya aten Myen hpyen dap gaw KIA pawng hpawm hpung ni zing madu da sai ginra ni de Jet nbungli bawm wa jahkrat bun ai lam galaw nga ai majaw hpyen koi yen Mung masha ni buga de wa nga na lam grai myit tsang nga ma ai sha n-ga Nmawk ginra de mung Manmaw maga de na hpyen n-gun jat htu shadut htim gasat nga ai shata masum daram rai wa sai re hpe mung chye lu ai.
コメント