Pajau Media Channel
3rd September, 2024
Wunpawng Mungdan Shanglawt Asuya KIO/ KIA ginjaw ginra kata Laiza kaw na Gara Yang, Myo Tit Kong Law, Daw Hpum Yang hte Gangdau Yang ginra de mung masha ni hkawm sa hkawm wa lam a matu manu hkyem sa ai hte Bus mawdaw hkawm ai lam hpe September 2 ya kaw nna hpang nga sai lam chye lu ai.
Bus mawdaw daru hpe Laiza Munglai Hka mahkrai makau kaw masat da ai rai nna Laiza kawn Daw Hpum Yang du hkra lap 2,500, Laiza kawn Myo Tit Kong Law du hkra lap 5,000, Laiza kawn Gangdau Yang du hkra lap 2,500, Laiza kawn Gara Yang du hkra lap 5,000 hte mai hkawm sa sai lam chye lu ai. N-gu, Mam, Gala Shapre, Shakau zawn re ai gunrai ni hpe Buri Buk Mi kaw lap 2,000, Sau 25-liter nga ai Pung Mi kaw lap 1,000 htaw manu masat nna hkrun lam hkawm masha hte hpawn hkawm sa nga sai lam chye lu ai.
Bus mawdaw hkawm sa aten hpe jahpawt hkying 7:30 AM hta Gara Yang mare de rawt ai re hte shana daw hkying 1:00 PM aten daram hta Daw Hpum Yang Maga de bai hkawm sa ai re sha n-ga hkrun lam hkawm masha n nga ai raitim masat da ai aten laman hta hkawm sa dingyang re hpe mung chye lu ai. Ginjaw ginra kaw daju nna hkrun lam hkawm Bus mawdaw ni manu hkyem sa ai hte hkawm sa lu na matu KIO Asuya Mung Chying Uphkang Dap kaw nna lit la galaw wa ai re lam mung chye lu ai.
Comments