KIO Uphkang Ginra Kata Na Mung Masha Ni Mare Buga De Wa Nga Na Matu Hkyen Lajang Ai Hta Garaum Ningtum Lam Grai Ra Kadawn Nga

Pajau Media

31.10.2024

KIA pawng pawm hpung ni kawn March 7 ya majan hpang ai kaw nna Myitkyina-Nam San Yang lapran Myen hpyen dap tsep kawp n nga mat sai re majaw shaning na na hpyen koi yen sai Mung masha ni gaw mare buga de wa nga na matu htingput htingra hkyen jasan hpang nga ai hta garum ningtum lam ni law law ra kadawn nga ai lam chye lu ai.

Shaning shi jan ning na ai hpang bai wa gaw gap la ra ai re majaw dum nta htingput htingra kaw na hkawt n nan kaw na bai gaw gap la ra ai hta garum ningtum lam ni grai ra kadawn nga ai lam hpyen yen Mung masha ni tsun dan ai re.

“Hkum kaman hprawng yen wa ai re majaw hpa mung hpa yawng sum machyi ai hkrai re sai. Ya she hkyen jasan wa ai re majaw grai naw shakut la ra ai. Garum shingtau na ni hpe mung myit mada nga ga ai. Anhte hkrai anhte galaw la na ngu gaw n loi la sai,” nga nna tsun ai.

Hpyen yen Mung masha ni buga de wa nga magang ai nga tim buga ginra langai hta madung ra ahkyak ai Hkamja lam, Hpaji lam, Myihprap Wan, Hka zawn re ai ni yawng mung n nan kaw na bai gaw dap la ra ai re majaw kalang ta nta nawng wa nga na matu rai n mai byin shi ai lam tsun ai re.

“Tinang buga de bai wa nga lu ai majaw grai kabu ai. Shang lawt Asuya hpe mung chye ju dum ai. N nan bai gaw gap hpang wa ai re majaw yawng jawm garum la yang gaw shi hte shi gaw she n rai wa na i. N garum yang mung n mai nga gaw, hkamja lam hpaji lam kaw na hkawt le, n nan kaw na gaw gap la ra ai re majaw nta masha yawng kalang ta wa nga na mung naw yak ai masa re,” nga nna hpyen yen Mung masha ni tsun ai re.

Myen hpyen dap n nga sai Myitkyina-Nam San Yang mare lapran na Mare kahtawng ni rai nga ai Npawn, Gang Dau, Ja Pu, Katsu mare hkan na Mung masha ni gaw lai wa sai 2011 majan byin hpang wa ai kaw nna lu ai sut gan ni yawng hpe tawn kau da ai let hkum kaman hprawng yen wa ai re.

Majan byin lai wa ai shara ni re majaw nam maling kata de sa hkawm na matu mung hkam bawm dingsa ni naw tsang ra ai hte htingra jasan jaseng ai lam galaw let kapaw la ai lam ni nga ai majaw naw tsang ra ai masa re hta ya aten nam de shang hkawm na matu mung hkrit ra ai lam chye lu ai.

KIA pawng hpawm hpung ni htu shadut majan hpang wa ai kaw nna Myitkyina-Manmaw lam mayan na Myen hpyen dap shara law law hpe zing madu la lu sai re hte ya aten zing madu da lu sai shara ni hkan Wunpawng Mungdan Shanglawt Asuya Uphkang Sai Ru hte hkrak uphkang hpang nga sai re hpe mung chye lu ai.