Pajau Media Channel
14th June, 2024
KIO uphkang ginra kata na asuya jawng ni hta 2023-2024 hpaji ladaw a matu tsang shi san poi hkrat ai jawngma ni tsang shalun san poi hpe June shata praw 5 ya shani kaw nna nhtoi 12 ya du hkra 7 ya tup galaw ai lam chye lu ai.
Dai ning na tsang shi san poi hta hkrat sum ai jawngma yawng pawng 1,233 tup nga ai hta tsang shalun san poi hpe bai kahtap htai ai jawngma yawng pawng 1,113 tup bai htai ai re.
Ya na zawn tsang shalun san poi hpe bai kahtap htai ai lam gaw du wa na shaning ni hta tsang ning gam hpaw jat na masing ni nga ai re hte sharin ladat ni mung gram sharai da ai rai nna tsang shalun san poi san jep ai lam mung dai ning hpang jahtum rai na re lam, chye lu ai.
Tsang shalun awng/sum mahtai hpe gaw du wa na July shata hta ndau shana na rai nna awng pru jawngma ni gaw 2023-2024 hpaji ladaw awng pru jahpan hta tara shang bai jat bang na re lam chye lu ai.
KIO hpaji magam dap a 2023-2024 hpaji ladaw tsang shi awng/sum mahtai hpe lai wa sai May shata praw 1 ya shani ndau shana ai hta san poi shang htai ai jawngma yawng pawng 3,126 nga ai hta awng pru ai jawngma gaw yawng pawng 1,893 tup re. Dai hta jawngma 1,233 tup hkrat sum ai hpe tsang shalun san jep ya ai lam re hpe mung matut chye lu ai.
Comentarios