Pajau Media
13.11.2024
Jarit mayan gasat gala majan laja wa ai hpang kaw nna Miwa maga kawn jarit chyinghka yawng hpe pat kau ai rai nna kalang mi bai Miwa maga kawn Laiza, Loi Je hte Kanpaiti jarit chyinghka ni hpe bai hpaw na matu tsun wa ai raitim KIA maga kawn bai pat kau sai re lam jarit mayan Mung masha ni tsun ai kaw na chye lu ai.
Miwa maga kawn Loi Je hte Kanpaiti jarit chyinghka hpaw na matu tsun ai raitim KIA maga kawn gaw hpaw na rai yang jarit chyinghka yawng hpaw, n hpaw na rai yang tsep kawp n hpaw ai lam tsun da ai re.
Miwa maga hku nna gaw jarit chyinghka hpaw ai hte Myen mungdan de shang wa na gunrai mawdaw ni grai dingren taw ai raitim KIA maga na pat da ai majaw n lu lai wa ai masa re lam Laiza ginra masha shiga dap ni de tsun da ai re.
Sam Mung dingdung daw Muse ginra hta mung Miwa maga kawn jarit chyinghka bai hpaw ai raitim Myen hpyen dap maga na pat da ai majaw Miwa de na Myen mungdan de shang wa na Yangyi, Shakau, hte namlaw namlap htaw mawdaw Tsa kaba chyat taw nga ai re lam mung chye lu ai.
Comentários