Pajau Media
25.11.2024
Hpang jahtum ngam ai Miwa jarit Kapaiti hpe KIA pawng hpawm hpyen hpung ni zing madu uphkang ai hpang November 24 ya kaw nna Miwa maga kawn jarit chyinghka hpaw ya sai raitim Miwa hkran na gunrai mawdaw ni Myen mung de shang wa ai lam n nga shi ai re nga nna ginra masha ni tsun ai.
Myen mung hkran maga na Langu htaw mawdaw ni gaw Miwa hkran de shang hpang sai raitim Miwa maga na gunrai mawdaw ni gaw Myen mungdan de shang wa ai lam n nga shi ai lam mung chye lu ai.
Miwa jarit mayan hpe KIA pawng hpawm hpyen hpung ni htim gasat wa ai hpang kaw nna jarit chyinghka ni yawng hpe Miwa maga kawn pat kau ai majaw Jinghpaw mung kata gunrai pru shang lam hkring mat nna ya aten Myitkyina hte Waimaw ginra kata gunrai manu ladu lai tsaw wa ai sha n-ga Jak Sau taw ai mayak hkrum sha nga ai gaw ya aten du hkra re.
Ya aten Jak Sau seng kaba law malawng pat nga sai re hte Jak Sau lu ai seng hkan gaw dingren nna she bang la ra ai hta shadawn sharam nna she bang ya nga ai hte Jak Sau manu 1 liter kaw lap 15,000 du hkra tsaw nga ai sha n-ga mari bang na matu mung grai yak nga ai masa re hpe mung chye lu ai.
Kanpaiti muklum hpe KIA pawng hpawm hpung ni n zing shi ai aten November 18 ya daram kaw nna Miwa maga kawn Kanpaiti jarit chyinghka hpe pat kau ai re. November 20 ya shana daw hta gaw KIA pawng hpawm hpung ni zing madu ai hpang Miwa maga kawn jarit chyinghka hpe bai hpaw ya wa ai re hpe mung chye lu ai.
Ya aten Kanpaiti shagyit hta lai nna Jinghpaw mung kata nga ai Miwa jarit chyinghka ni bai hpaw ai lam n nga shi ai re hpe mung chye lu ai.
Comments