Pajau Media
22.10.2024
KIA Pawng Hpawm Hpyen Hpung ni kawn October 15 ya shani kaw nna htu shadut htim gasat ai Shing Chyai mare kaw daju ai Myen Hpyen Dap npu na jarit sin hpyen dap Masat 1003 hpe October 22 ya jahpawt daw hta htim gasat zing madu la lu sai lam chye lu ai.
Masat 1003 Dap gaw Kanpaiti Muklum hpe sin kawp galaw ai dap kaba langai re the nhtoi 6 ya na hkra htu shadut htim gasat ai hpang zing madu la lu ai re lam chye lu ai.
Lai wa sai October 15 ya shani hta gaw jarit sin hpyen dap 1002 Dap hpe KIA Pawng Hpawm Hpung ni htim gasat zing madu ai hpang 1003 hpe mung bai zing madu wa ai re lam chye lu ai. Ya aten jarit sin hpyen dap 1001 sha ngam sai rai nna masat 1002,1003 hpe gaw KIA maga kawn tsep kawp madu kau sai re.
Miwa jarit mayan shamu shamawt nga ai jarit sin hpyen hpung ni a ginjaw ginra rai nga ai Pang Wa Muklum hpe mung October 18 ya shani KIA maga kawn tsep kawp zing madu la lu sai rai nna KIO Uphkang Policy ni hte uphkang hpang wa magang sai re hpe mung chye lu ai.
Comments