Kanpaiti Ginra Kata P.T.Ts Hpung Ni Laja Lana Hpyen Lahkawn Nga

Pajau Media

14.10.2024

Miwa Mung jarit Kanpaiti ginra hta Myen Hpyen Dap npu na P.T.Ts hpung ni gaw ginra masha ni hpe October praw laman kaw nna hpyen lahkawn ai lam laja lana galaw nga ai re hpe mung chye lu ai.

P.T.Ts hpung ni gaw mare kata ramma hte asak naw ram ai Wa ngan ni hpe masat tawn nna hpyen lahkawn nga ai rai nna dum nta kaw nga taw ai ni hte Lu Sha Seng ni hkan lu sha chyai nga ai ni yawng hpe lahkawn ai re hpe mung chye lu ai. Ya na zawn hpyen laja lana lahkawn ai lam gaw Myen hpyen dap a matu hpyen n-gun jat hkra galaw ai lam re nga nna Mung masha ni tsun dinglun nga ai re.

P.T.Ts hpung ni kawn hpyen laja lana lahkawn ai majaw ginra masha ni grai hkrit tsang let nga ra ai lam, Myitkyina-Kanpaiti hkawm sa lam dingyang hkawm sa hkawm wa lam mung grai sadi let hkawm sa nga ra ai lam chye lu ai.

Ya aten Myen mungdan shara shagu gasat gala majan laja nga ai hte Jinghpaw mung ginra kata hta mung gasat gala majan sawng nga ai rai nna P.T.Ts hpung ni Laksan Uphkang ai ginra kata hkan du hkra majan laja nga ai majaw P.T.Ts hpung ni kawn mung shanhte dep hkap ai ginra kata hpyen lahkawn shamu shamawt ai lam ni shawoi na hta grau galaw wa ai re hpe mung chye lu ai.