Pajau Media
4th November, 2024.
Kachin Laksan Masat (1) ginra hta nga ai jarik sin Dapba masum tup hpe Wunpawng Mungdan Shanglawt Hpyen Dap (KIA) pawng hpawm hpyen hpung ni kawn gasat zing madu da lu sai re hte, ya aten Miwa mung jarik Kanpaiti muklum langai sha ngam nga sai re lam, ginra shi sawk ni kaw na chye lu ai.
Kachin Laksan Masat (1) ginra hta na hpang jahtum ngam nga ai Hpimaw muklum hta dap jung tawn da ai jarik sin hpyen dap masat 1001 dapba hpe October shata 31 ya shani hta KIA pawng hpawm hpyen hpung ni kawn gasat zing da lu sai re.
Dai hpang Hpimaw sa lam hta dap jung nga ai jarik sin masat 1001 dapba hte rau, masat shadaw (7) kaw dap jung nga ai gumshem Myen hpyen dap Hk.L.Y (298) n-pu na post hpe zing la ngut ai hpang, November shata praw 2 ya shana daw aten hta Hpimaw muklum kaba hpe KIA kawn matut manoi gasat zing da lu sai re.
Ginra masha ni tsun ai hta Miwa mung jarik muklum rai nga ai Kanpaiti hpe n-gasat na matu Miwa gaw KIA hpe tsun shadut ai lam ni nga ai re majaw KIA kaw nna mung Kanpaiti muklum hpe n-gasat ai sha, wang da ai masa hta hkring nga ai re lam chye lu ai.
Maga mi de gaw Kanpaiti kaw dap jung nga ai gumshem Myen hpyen dap ni kaw nna KIA wuhpung ni nga ai maga de hpyen n-gun htu shadut lung wa ai lam jahkring hkring galaw taw nga ai sha n-ga, Pyi Tu Tsit wuhpung ni kaw nna mung Mung shawa hpe hpyen lahkawn, jahkrit shama ai lam dingyang galaw nga ai nga nna, ginra masha langai lawu na the maren tsun dan ai re.
“Pangwa, Chihpwi ndai maga na ya hte zing ngut ai shara hkan na Myen hpyen la ni wa ya gaw Kanpaiti kaw yawng wa zup ai hku rai taw le. Ngut na Pyi Tu Tsit ni mung hpyen grai lahkawn taw ai nga chye lu ai. Ya Kanpaiti kaw gaw Myen hpyen la n-gun grai gahkyin taw ai rai sam ai,” nga nna ginra masha langai tsun dan ai re.
Wunpawng Mungdan Shanglawt Hpyen Dap (KIA) gaw Kachin Laksan Masat (1) ginra, ginjaw hte rau gumshem Myen hpyen dap n-pu na Pyi Tu Tsit dap hte jarik sin dap ni ma hkra hpe October shata laman hta sha yawng zep zi gasat zing da lu sai re.
Comments