Ka Mai Ginra De Hpyen N-Gun Hkying Lam Du Shang Nna Shamu Shamawt Nga

Pajau Media

April .28.2025

Jinghpaw mung Ka -Mai ginra hta Myen hpyen dap kawn hpyen n-gun hkying lam du shang wa nna ya aten Ka Mai muklum kata hpyen n-gun hkying masum daram shamu shamawt nga ai lam ginra masha ni tsun ai.

“Myen hpyen dap maga na tsun ai gaw hpyen n-gun 500 daram du shang ai lam tsun tim ta tut hta hpyen n-gun 3,000 daram nga ai, ya du nga ai hpyen la ni gaw muklum kata kaw nre sha muklum shinggan hkan shamu shamawt nga ai,” nga nna Ka Mai ginra masha tsun ai.

Ya du wa ai ni hpe yu yang shara shagu hkan na atik anang lahkawn da ai ni rai na masa nga ai hte n kau hpyen la ni gaw jawng lung ram ai ramma ni law ai re hte hpyen hkring atsawm n hpun ai sha sinat lang nna shamu shamawt nga ai lam ginra masha matut tsun ai re.

“Ya n dai kaw du nga ai hpyen la ni hpe yu yang asak naw kaji ni law ai hpe mu lu ai. Myen hpyen dap kawn ntara ai hku rim woi nna shawng lam de sa ai ni rai sam ai. Hpyen hkring pyi hkum hkra n lawm ai, shinggan hkring hte sinat hpai nna hkawm sa nga ma ai,” nga nna tsun ai.

Myen hpyen dap gaw Manmaw ginra sha n-ga Hpakant ginra hkawm sa lam de lai wa sai April 24 ya daram kaw nna hpyen n-gun laja lana htu shadut nga ai rai nna Ka Mai ginra mayan de KIA pawng hpawm ni hte Myen hpen dap lapran gasat gala majan byin ai re. Manmaw ginra de mung April 25 ya kaw nna nbungli bawm, lak nak kaba, Drone ni hte laja lana gap bun nga ai lam chye lu ai.

Shiga- Hpring