Jinghpaw Mungdaw Myitkyina Muklum Shara Nkau Hta Kani Namhpan Hpe Kam Mara Dut Mari Nga

Pajau Media

5 February 2025

Jinghpaw mungdaw Myitkyina muklum Rampu lawk hte Chyet Paung Chyan lawk na lam jut shara shagu hta kani namhpan hpe kam mara dut mari nga ai hte jai lang ngut sai samyit ni mung atsawm n kabai ai sha lam ntsa hkan ayai da ai hpe Myitkyina ginra masha ni tsun ai kawn chye lu ai.

“Balik dap du hkra laika mara tim ahkyak nla ya ai majaw namhpan lu sha ai ni mung hkrup mara, samyit ni ma hkrup mara kabai nkau mi gaw ga kata lup ai raitim atsawm nlup ai majaw bai le wa ai. Damya mya ai hte rai gashun ai lam ni du hkra sawng wa ai,” nga nna Myitkyina ginra masha amyu shayi langai tsun ai.

Namhpan jai lang ai masha ni mung lam ntsa hta jai lang taw ai hte jan shang ten hte shana hkying 8 laman grau law nna uhpung hku jai lang taw ai hte kalang marang shani ten raitim lang taw ai ni mung nga ai hpe tsun ai.

“Lam hkan dai hku sha lang taw ma ai. Shana jan shang ten hte shana hkying 7 hkying 8 hkan grau law ai. She sumpum hkra lam hkan, wang hkan dai hku sha htu taw ma ai,” ngu tsun ai.

Dai hku namhpan jai lang taw ai masha law malawng gaw asak 20 hte 30 lapran na ni hte lang ngut sai samyit ni hpe mung hkrup mara kabai da ai re. Ginra masha ni kawn balik dap de laika ka mara tim ahkyak nla ya ai majaw namhpan jai lang ai kaw na damya mya ai du hkra byin wa ai madang re hpe tsun dan ai re.

Myitkyina muklum kaw nga ai lawk shagu hta namhpam lusha jai lang ai masha hte dut mari ai masha grau law wa nhtawm kani dawn ai tsirung kaw methadone htuk sha ai ni mung mi na hta grau law wa ai hpe ginra masha ni tsun dan ai kawn chye lu ai.

Shiga - Hpring