Pajau Media
10th March 2025
Jinghpaw mungdaw hta Num ni hte seng nna Shinggyim Ahkaw Ahkang tawt lai hkrum ai gaw Myen mungdan ting hte shing daw yu yang tsang ra ai madang de du nga ai lam Kachin Human Rights Watch-KHRW kawn tang madun da ai hpe chye lu ai.
Myen hpyen kawn Daru Magam Zing ai hpang kawn Shinggyim Ahkaw Ahkang tawt lai hkrum ai gaw lani hte lani grau grau law wa nna 2025 ning February shata kaw na March shata 8 ya laman Jinghpaw mungdaw kata gadai re n chye ai tara tawt lai ai ni kawn sat kau hkrum ai Num ni grai ław wa nga ai hpe mu lu ai lam tsun ai.
Jinghpaw mungdaw kata Myitkyina muklum hta sat kau hkrum ai Num ni law dik htum rai nna, Waimaw hte Laiza hta mung sat hkrum ai ni nga ai lam chye lu ai.
Myitkyina Lekone lawk hta February 14 ya shani nta kata masha langai sat hkrum nna, 17 ya shani hta mung Shan Su lawk Computer Dakkasu makau hta cycle gasun katut ai numsha langai mung sat hkrum ai rai nna 22 ya shani hta mung KIO ginjaw Laiza makau na Je Yang hpyen yen dabang hta mung Num ma masum rim hkrum nna 26 ya shani hta sat hkrum ai lam ni nga lai wa sai re.
Bai nna March 1 ya shani hta Shatapru lawk kaw Num langai nhtu gahtam sat hkrum nna, 4 ya shani hta gaw Njang Dung Masat (6) jawng shawng na maza kabai ai shara hta mung ma kanu langai sat hkrum ai re hte 5 ya shani gaw Waimaw masat (5) lawk na nta langai kata hta Num kasha langai matut sat hkrum ai ni nga lai wa sai re.
Dai sat hkrum ai ni hta kadai sat ai hte kadai sat shangun ai lam, dai ni du hkra nchye shi ai rai nna, kadai mung ahkyak la ai lam nnga ai a majaw Num kasha ni a shimlum lam hpe matut jahkrit nga ai re.
Tsang ra ai madang de du nga ai Jinghpaw mung na Num ni a shimlum lam hte seng nna ahkyak la ai ni mung nnga ai hta dai tara tawt lai ai ni hte jahkrit shama ai ni hpe ahkyak la ya ai lam ni galaw na matu mung shadum da ai hpe chye lu ai.
Shiga - Hpring
Comments