Jinghpaw Mung Sagaing Jarit Katha Ginra De Mung Myen Hpyen Dap Kawn Hpyen N-Gun Jat Shamu Shamawt Wa

Pajau Media

April 10, 2025

N dai laman Myen hpyen dap gaw Jinghpaw hte Sagaing jarit Katha ginra hkan hpyen n-gun jat shamu shamawt lam grau galaw wa ai re nga nna ginra masha ni tsun nga ai re.

Sagaing jarit mayan Katha ginra hta April praw laman kaw nna Hk.M.Y (309) de nbungli hku nna hpyen n-gun wa jat bang ai lam ni galaw ai sha n-ga hpyen dap kawng kaw nna makau grup yin de lak nak kaba gap shadam ai lam ni galaw nga ai re lam Katha ginra masha ni tsun ai re.

N dai masa hpe yu yang Katha ginra mung maja ra na masa nga ai lam ginra masha langai tsun ai re. “April praw daram kaw nna Helicopter hte manga kru lang bat nna hpyen n-gun wa jahkrat ai lam ni galaw wa ai. Sinnat kaba mung gap shadam ai. Ya gaw Indaw mung ngut sai re nga yang gaw Katha ginra mung maja ra na tai ai. Gara sa mung n gwi, galoi majan byin na ngu hpe maja taw ra,” nga nna Katha ginra masha langai tsun ai re.

Katha Muklum hte Deng 18 daram tsan ai Indaw muklum zing madu majan hpe KIA, KPDf, ABSDF pawng hpawm hpyen hpung ni 2024 August 16 kaw nna htim gasat hpang wa ai re hte shata 8 na ai hpang 2025 April 7 ya shana hta padang dip zing madu la lu sai re.

Indaw muklum zing madu majan hta lak nak arung arai hpan hkum hte Indaw majan kaw nna hprawng lawt mat ai hpyen bawng masha marai 100 jan hpe mung Katha ginra hta rim kau lu ai lam ginra shiga dap ni de Mung shawa hpyen hpung maga kawn tsun da ai kaw na chye lu ai.

April 10 ya jahpawt daw hta mung Jinghpaw mung Waimaw ginra de Myen hpyen mawdaw lahkawng hte hpyen n-gun jat nga dingyang re hte Waimaw lam makau mayan hkan mung hpyen la grai gamawng hkawm nga ai re hpe chye lu ai.

Myen hpyen dap gaw maga mi de htu shadut gasat gala majan gan jahkring ai lam n dau ai raitim Jinghpaw mung ginra de hpyen n-gun jat shamu shamawt ai lam n dai laman grau galaw wa ai re.

Shiga – Pyilan U