Jinghpaw Mung Kata Phone, Internet Pat Da Ai Shata Lahkawng Na Wa Sai Raitim Bai Hpaw Ya Ai Lam N Nga Shi

Pajau Media

21.9.2024

Myen hpyen dap Asuya kawn Jinghpaw Mung kata Phone, Internet line ni pat kau ai shata lahkawng na wa sai raitim ya aten du hkra bai hpaw ya ai lam n nga shi ai re.

Ya na zawn Internet, Phone line ni pat kau ai hpang Jinghpaw Mung kata gasat gala majan ni mung lani hte lani laja nga ai sha n-ga Phone, Internet hte sut hpaga galaw ai ni, hpaji tam ai ni grai yak hkak mat ai gaw ya aten du hkra re. Jinghpaw Mung Myitkyina ginra hta gaw MPT phone line hpe hpaw da ya ai raitim line nau n kaja ai re hpe mung chye lu ai.

Ya aten Mung masa hpyen masa a majaw hkawm sa hkawm wa hkrun ni mung grai yak hkak wa ai hte shimlum lam n nga ai hta matut mahkai lam ni mung pat da ai re majaw ginra masha ni gaw matut mahkai lam lawan hpaw ya na hpe mung ra sharawng nga ma ai lam chye lu ai.

Jinghpaw Mung hta bai byin hpang wa ai htu shadut majan hpang hpyen koi yen Mung masha ni mung lani hte lani law jat wa ai re hte matut mahkai nlu mat ai majaw garum ningtum lam ni mung n lu wa ai hte garum ai arung rai, ja gumhpraw ni mung aten dep n lu la ai mayak ni hpe hpyen yen dabang shagu ngu na daram hta hkrum sha nga ai re.

Jinghpaw Mung kata matut mahkai lam n lu ai sha n-ga July shata ka-ang daram kaw nna Myitkyina-Mandalay mawdaw hkrun lam mung pat mat ai majaw Jinghpaw Mung kata gunrai manu ni ladu lai rawt tsaw nga ai hte gunrai taw ai mayak ni mung hkrum sha nga ai re.

Internet line ni pat kau ai majaw Myitkyina Muklum hte Hpakant ginra ni hta gaw IP star, Star Link jai lang ai shara ni law wa ai hte hkying hkum mi kaw lap 20,000 jaw nna mai lang ai raitim shang gumhpraw n nga, bungli n lu re ai Mung masha ni gaw nlu lang ai madang byin nga ai re hpe mung chye lu ai.

Hkying hkum mi hta lap 20,000 jaw nna mai lang ai raitim Internet wa lang ai ni hpe Myen hpyen dap kawn jepjoi rim ai lam ni nga ai lam shiga ni mawng nga ai re. Jinghpaw mung ginra kata July 21 kaw nna matut mahkai lam ni yawng pat mat ai re hte ya aten ginra n kau hta Ooredoo, Atom ni mai shaga ai raitim Myitkyina Muklum kata hta gaw MPT hta lai nna kaga phone line ni gaw n mai shaga ai madang re hpe mung chye lu ai.