Pajau media
13/December/ 2024
Jinghpaw mung, KIA ni zing madu da sai Miwa jarit shagyit ni hpe dai ni December 13 ya shani jahpawt daw kaw nna bai hpaw hpang wa sai lam hpe jarit ginra nga Mung masha ni kaw na chye lu ai.
Miwa gingjaw asuya ni a saw shaga ai majaw December praw 8 ya hta KIO Ningbaw kaba Du Daju Jum Nban La woi awn ai hpung ni Miwa mung de bawng ban jahkrup masing hpang Miwa asuya maga na shagyit nkau ni hpaw hpang wa nna dai hpawt kaw nna gaw KIO asuya hpung kaw na mung Loi Je jarit hpaw wa lam re ai hpe Jinghpaw shiga ni hta tang madun da ai.
KIA zing madu da ai miwa jarit chyinghka n kau bai hpaw nga sai raitim Kan Pai Ti shagyit hte Pangwa shagyit gaw hpaw ya ai lam nnga shi ai hpe Pangwa ginra masha langai tsun ai re .
Wunpawng mungdan shanglawt hpyen dap KIA pawng hpawng dap ni a htu shadut majan hpang ai March 7 ya shani kaw nna Jinghpaw Mung kata na myen hpyen dap shara Law malawng hte muklum nkau mi sha n-ga Miwa jarit yawng hpe zing madu da lu sai re.
September shata hpang jahtum bat kaw na hpang ai Pangwa Laksan Uphkang ginra de majan laja wa ai hpang Miwa jarik Pangwa , Kan Pai Ti yawng hpe zing madu da lu sai re.
KIA pawng hpawng dap ni zing madu uphkang ai hpang majan a majaw jarik shagyit ni hpe Miwa maga kaw na pat da ai hpe December praw 13 ya shani hta bai hpaw hpang wa ai rai nna dai hpawt kaw na Laiza jarit shagyit kaw na gunrai hte masha ni lai wa lai sa galaw taw sai lam hpe chye lu ai.
Commenti