Pajau Media
16.9.2024
Jinghpaw Mung kata byin nga ai gasat gala majan a majaw hpyen koi yen ai Mung masha lani hte lani law jat wa ai re hte Myen hpyen dap Mungdan ahkaw ahkang, Uphkang masa zing madu ai hpang kaw nna rai yang hpyen koi yen Mung masha mun matsat jan bai jat wa ai lam UNHCR kawn n dau da ai kaw na chye lu ai.
Jinghpaw Mung kata majan bai byin hpang ai 2011 kaw nna 2021 shaning du hkra gaw Hpyen yen mung masha marai 110,500 re raitim Myen Mungdan daru magam ahkang aya zing madu ai hpang 2024 August shata du hkra rai yang hpyen yen mung masha marai 194,900 du hkra jat wa ai re lam mung chye lu ai.
N dau laika hta Myen hpyen dap Mungdan ahkaw ahkang zing madu ai 3 ning jan laman hpyen yen koi yen mung masha marai (84,400) bai jat wa ai lam tsun da ai re. 2021 shawng daw hta gaw Myen mungdan kata Rudi amyu sha ni nga ai mungdaw ni hkan sha gasat gala majan nga ai re raitim 2021 hpang daw kaw nna gaw Myen mungdan ting gasat gala majan byin ai hte rawt malan hpung ni nga ai ginra hkan mung majan grau laja wa ai re hpe mung chye lu ai.
Jinghpaw Mung kata 2023 April shata daram kaw nna Shwe Gu sinpraw hkran ginra kata byin ai gasat gala majan a majaw mare kahtawng 12 kaw na Mung masha mun mi jan gaw mare ting koi yen ra mat ai re. 2024 March 7 ya kaw nna Jinghpaw Mung kata Wunpawng Mungdan Shanglawt Hpyen Dap KIA, PDF pawng hpawm hpung ni kaw nna htu shadut majan hpang wa ai hta Jinghpaw Mung kata koi yen kau da ra ai mare kahtawng ni law wa ai re hpe mung chye lu ai.
Mung masha ni gaw shanglawt gai wang de koi yen ai ni nga ai zawn Nam hkan mai byin ai hku naw koi yen taw ai Mung masha ni naw nga ai re hpe mung chye lu ai. Ya aten Jinghpaw mung kata Phone, Internet Line, hkrun lam ni mung pat da ai re majaw ya aten Jinghpaw Mung kata na Mung masha ni sha n-ga hpyen koi yen mung masha ni grai yak hkak nga ma ai re hpe mung chye lu ai.
Hpyen koi yen mung masha ni lani hte lani law jat nga ai hta garum ningtum jaw ai lam mung grai yawm wa ai re hte ya aten hpyen koi yen Mung masha ni hta malu masha tsi mawan ni hpyen koi yen dabang shagu ngu na daram hta yak hkak nga ai re hpe mung chye lu ai.
Myen mungdan gaw gasat gala majan byin ai ginra grau grau law wa ai re hte maga mi de myen hpyen dap gaw Mung Dinghku Majan hta Nbungli, Drone bawm ni hkrup mara gap sharu bun ai majaw Mung masha asak si sum ai lam lani hte lani law jat nga ai re hpe mung chye lu ai. Myen mungdan kata byin ai gasat gala majan a majaw Myen mungdan madang hku rai yang hpyen koi yen mung masha marai wan 32,991,000 du nga sai re hpe mung chye lu ai.
Comments