Pajau Media Channel
4th September, 2024
Jinghpaw Mung ginra kata gunrai manu gaw tsaw nga dingyang re sha n-ga ginra n kau hta N-gu Buk Mi kaw sen masum du hkra tsaw nga ai hte Mung masha ni galaw lu galaw sha mahkrun ni mung taw wa nna grai yak hkak wa ai lam chye lu ai.
August 17 ya kaw nna Jinghpaw Mung de gunrai htaw shalai ai lam madung rai nga ai Mandalay mawdaw lam pat kau ai hpang gunrai pru shang lam n nga mat ai gaw dai ni du hkra re hte hkrun lam mung naw pat nga dingyang re hpe mung chye lu ai.
Ya aten Hpakant ginra gunrai manu ni gaw N-gu Buk Mi kaw lap 190,000 kaw nna 400,000 lapran nga ai lam, Jum joi mi kaw lap 10,000, Shakau Hkyeng joi mi kaw lap 5,000, Shakau Hpraw joi mi kaw lap 20,000, Shanam joi mi kaw lap 15,000, Majap jahkraw Joi mi kaw lap 20,000, Ba Hkri Si joi mi kaw lap 7,000, U Shan joi mi kaw lap 35,000, Nga joi mi kaw lap 25,000 hte Jak Sau 1- liter kaw lap 9,500 du hkra tsaw nga ai lam ginra masha ni tsun ai.
Putao ginra hta gaw N-gu Buk Mi hta lap 280,000, Jak Sau 1-liter kaw lap 20,000, U di kat mi kaw lap 24,000, Sha Sau joi mi kaw lap 35,000, Shakau Hkyeng joi mi kaw lap 12,000 hte Jum joi mi kaw lap 5,000 du hkra tsaw nga ai re hpe mung chye lu ai. Dai zawn sha Myitkyina kaw mung N-gu buk mi kaw lap 200,000 daram du nga sai lam, U di kat mi hta mun masum jan, Nga joi mi kaw mun mali jan, Sha Sau joi mi kaw lap 28,000, Jak Sau 1-liter kaw lap 6,500 hte pepar mi kaw Sen 30 jan du nga ai lam chye lu ai.
Jinghpaw Mung ting hta Gunrai Mawdaw hkawm sa lam hkring mat ai hte gunrai shang ai lam n nga ai, N kau hpe nbungli hku htaw shalai la ai re majaw manu gaw tsaw nga dingyang re lam mung chye lu ai. Ya aten Jinghpaw mung kata shanu nga ai Mung masha ni grai yak hkak nga ai lam, Myitkyina, Hpakant, Putao ginra na tsi rung tsi gawk ni hkan tsi mawan taw ai mayak ni mung hkrum katut nga ai re hpe mung chye lu ai.
Sagaing-Jahpaw mung jarit mayan hta pawng hpawm rawt malan hpung ni hte myen hpyen dap lapran gasat gala majan laja nga ai majaw August 17 ya kaw nna Jinghpaw Mung de madung gunrai htaw shalai hkrun lam hpe aten n masat pat kau ai gaw ya aten du hkra re.
Commenti