Pajau Media
18 February 2025
Jinghpaw MMA fighter kaba Nsang Awng La gaw du wa na February praw 20 ya shani hta Turkey mung masha Shamil Erdogan hte Qatar mungdan Lusail muklum hta bai htawng shing jawng sa wa na re hpe chye lu ai.
“Burmese Python” ngu mying gumhkawng wa nna One Championship na Middleweight hte Light Heavyweight na Champion dingsa Nsang Awng La hte Shamil Erdogan gaw ONE-171 gabaw hte galaw ai poi hta numdaw lahkawng lang ngu na bai htawng shing jawng sa wa na re.
Awng La Nsang gaw Shamil Erdogan hte lai wa sai 2024 ning September shata hta ONE-168 gabaw hte galaw ai poi lamang hta htawng shing jawng lai wa sai re hte poi ten lahkawng lang ngu na aten hta sum mat ai re.
Myen mung gawng malai Champion dingsa Nsang Awng La gaw asak 39 ning rai nna MMA htawng ginsup poi 45 lang ginsup wa ai hte 31 lang dang wa nna 14 lang gaw sum ai re hte poi langai gaw n galaw mat ai record-holder re.
Nsang Awng La hte shing jawng sa wa na Shamil Erdogan gaw asak 34 ning rai nna MMA htawng ginsup poi 10 hta sum poi nnga shi ai re.
Champion shingkyit lahkawng hpe sum mat ai Champion dingsa Nsang Awng La gaw ya du wa na poi na matu Qatar mung hta du taw sai rai nna ya kalang gaw awng dang ai hte bai wa na hpe gaw naw la yu ra na re.
Shiga - Zau
Comments