Pajau media
26th February 2025
KIO/KIA a ginjaw ginra Laiza muklum makau na Je Yang hpyen yen dabang hta asak 10 ning ram re ai num kasha (3) hpe woi mat nna hkrup mara zingri sat ai mabyin byin ai rai nna, ya dai mabyin galaw ai wa hpe KIO Asuya kawn rim ahkyak la da ai lam ginra masha ni tsun ai.
Dai mara galaw ai wa Slg. Ung Sau Doi Awng hpe mani February 25 ya shani rim da nna san jep ai lam hta woi mat wa ai num kasha ma masum a moi mang hpe bai mu la sai re lam tsun ai.
“San jep nna sa tam ai kaw mana shana maga hkalawng makau hta moi mang lahkawng hte dai hpawt maga sumri gyit noi da ai moi mang langai hpe bai mu ai. Hkalawng na lahkawng hpe gaw lata hpe shingdu maga gyit da nna nlung hte dip sat da ai re, hpang langai wa hpe ma lata hpe shingdu de gyit da na myiman hte num hkum ni hpe nhtu hte galep da hkang ai. Myi tum ni mung baw shaw kau ya nna hkrup mara zingri nna sumri hte noi sat kaw da ai,” nga Je Yang hpyen yen masha langai tsun ai re.
Rim da hkrum ai num ma kasha masum kaw na lahkawng gaw mani shana maga hkalawng makau hta hka dip sat da ai hkrang hte mu tam la ai rai nna, langai hpe gaw dai ni February 26 ya jahpawt maga de sumri gyit noi sat da ai hpe mu tam ai lam chye lu ai.
Dai ma masum gaw asak 10 ning ram re ai num kasha ni rai nna moi mang ni hpe bai mu tam la ai shaloi lata ni gyit da nna lagaw ni mung gyit da ai lam, nlung hte dip da ai lam, myi hte myiman ni hpe nhtu hte galep da ai re hte num hkum hta mung nhtu hkang hkang let mu la ai lam lahta na wa tsun ai re.
Mabyin gaw lai wa sai February 22 ya sha ni hta mara galaw ai wa a madu jan hpang de sa wa ai ma marai masum hpe asak 25 ning re ai tara hkam la wa gaw rim woi mat ai rai nna, ma a kanu kawa ni hpe “Sawng Oo” nga ai WeChat mying the shanhte masum a sumla madun let Miwa gumhpraw Yuan hkying masum jahkrit hpyi ai lam chye lu ai.
Tara hkam wa a madu jan gaw hpyen yen dabang hta laika sarin ya nga ai jawng sara num langai rai nna dai num ma kasha ni mung dai sara num a jawng ma ni re lam chye lu ai.
Tara hkam Slg. Ung Sau Doi Awng gaw shawng de mung mara langai galaw da ai majaw hkyuk hkawng kata si ari kaw na lawt pru wa ai rai nna, ndai laman sha dai htawng kaw na lawt le wa ai re hpe chye lu ai.
Dai ma masum gaw asak 10 ning ram re ai Shy. Nanzing Ji San Mai, Shy. Hpauyam Sut Seng Ing hte Shy. Lahtaw Roi Ji ni rai nna, moi mang ni hpe gaw dai ni Je Yang hpyen yen dabang hta lup kau sai re hte matut nna tara jeyang ai lam hpe gaw Pajau Shiga kawn matut shawk sa gawn tang madun mat na re.
Shiga - Hpring
Comments