Pajau Media
23.9.2024
Hpyen yen aten ladaw na wa ai hte maren garum ningtum lam ni yawm wa ai rai nna ya aten Jarit mayan koi yen ai hpyen yen ni law malawng gaw buga de wa nna Yi, Sun Hkauna galaw lu galaw sha ai lam law ai raitim jak sau manu grai rawt wa ai majaw hkawm sa hkawm wa pyi yak hkak wa ai lam jairt mayan hpyen koi yen mung masha langai tsun ai.
“Jarit mayan re majaw Miwa gumhpraw sha law malawng jai lang ra ai, Myen gumhpraw gaw manu n nga wa ai daram re, galaw lu galaw sha shara gaw yak re na dinghku kata grai yak wa ai, ya gaw shanglawt uphkang ginra re sai majaw Jarit mayan de koi yen ai ni law malawng gaw mare buga de Yi Sun galaw sha ai ni law wa ai, dai kaw she Jak Sau manu ni grai bai rawt na grai yak wa ai ga re,” nga nna Jarit mayan hpyen yen mung masha langai tsun ai re.
September praw daram kaw nna Jak Sau manu ni ladu lai tsaw lung wa ai re. Mai Ja Yang, Laiza mayan hta Jak Sau manu 1-liter kaw lap 18,000 - 20,000 grup yin nga ai re hte Miwa gumhpraw hpe madung jai lang ai re. Ya aten Miwa gumhpraw manu grai rawt taw ai hta Miwa Yun 130-150 kaw Myen gumhpraw lap 100,000 manu nga ai lam, Myen gumhpraw manu n nga wa ai majaw mari lu mari sha ai kaw na hkawt grai yak wa ai re hpe mung chye lu ai.
Mung masha ni gaw Padnag dip zing madu la lu sai, Nam San yang, Npawn, Nawku, Da law mayan de Yi sun galaw sha nga ma ai re hpe mung chye lu ai.Miwa jarit mayan hpyen koi yen dabang yawng re yang Dabang 13 daram nga ai re hte law malawng gaw Kumshu sun, Shaugaw Sun ni galaw sha ai law ma ai re. Jak Sau manu ni ladu lai tsaw wa ai majaw hkawm sa hkawm wa na matu pyi grai yak hkak wa ai masa re lam mung chye lu ai.
2021 Myen hpyen dap mungdan ahkaw ahkang zing madu ai hpang Jinghpaw Mung kata gasat gala majan grai sawng wa ai hte hpyen koi yen mung masha ni mun matsawt jan bai jat wa ai hte 2011 kaw nna 2024 du hkra Jinghpaw mung kata hpyen koi yen mung masha marai 194,900 ram du hkra nga wa sai re lam mung chye lu ai.
Comments