Pajau Media
10th February, 2025
Jinghpaw mung, Miwa jarit mayan hkan kumshu hkai ai ni kumsu manu nlu nna sum nga ai rai tim htingbu Miwa mung de sha dut ra ai lam kumshu hkai ai ni tsun ai.
Kumshu hkai ai ni Miwa mung de sha dut ai lam gaw kaga ginra hkan e gaw hkrum lam mayak, lam pat da ai ni, kaga ginra hte rai yang gunrai ginrawn na mayak ni hte Miwa mung sha ni htep dik re majaw re lam tsun ai.
Shawng de kumshu Ton langai hta Miwa gumhpaw Yuan (450) lu ai kawn Covid hpang de gaw kumshu Ton mi hta Yuan (350) sha manu lu mat ai sha n ga ya du hkra dai manu hta grau jaw mari ai lam nnga ai hpe mung chye lu ai.
Ginra masha ni gaw kumshu manu nlu ai raitim Miwa company kaw sha dut nga ra ai rai nna kumshu sun hta lang ai manu hte Miwa de htaw shalai ai saloi kumshu madaw langai hta Miwa Yuan (80), Myen gumhpaw lap Mun Mali jan ram jaw ra ai majaw sum ai re lam tsun ai.
Kumshu hkai ai ni gaw lai wa sai 2024 ning hat kumshu mari ai Miwa Company ni hpe manu jat jaw na lam jahkrup bawng ban laika tang da ai raitim manu jat jaw ai lam nnga ai lam kumshu hkai sha ai ni tsun ai re.
Jarit mayan na mung masha ni gaw kumshu sun hpe madung kanbau bungli shatai galaw sha nga ai gaw shi ning hku rai nna, kumshu ni hpe gaw Decembre shata kaw na March shata du hkra dan la ai re.
Dai sha n ga shaning shagu kumshu mari ai htingbu Miwa company hta sha ginrawn dut sha ai lam chye lu ai.
Shiga - YawngNI
Comments