Pajau Media Channel
9th July, 2024
Myitkyina muklum kata July praw hta Mali Hka tung lim wa ai majaw jak sau dut mari ai lam hta grai yak hkak mat ai hte ya aten jak sau seng ni law malawng hpaw nga ai raitim jak sau manu tsaw ai mayak naw hkrum sha nga ai re.
N kau seng ni gaw aten masat nna dut ya ai raitim law hkra dut ya ai lam n nga ai, shinggan gat lawk hkan jak sau 1 liter hpe 15,000 du hkra manu shatsaw dut nga ai re lam ginra masha langai tsun ai re.
“Madung gaw mari nna bai dut sha ai majaw re, sau seng hpaw ai nga ai hte bai dut sha na ni shawng wa dingren mari la sai, kaja nan yak hkak ai ni gaw n lu mari mat sai, sau seng kaw na ni mung shanhte kam ai manu hte dut ya ai, bai mari dut ai ni mung amyat shakap nna bai dut sha mung masha ni sha katut sha taw”.
July 7-8 ya kaw nna Myitkyina muklum kata jak sau seng n kau shawoi na zawn hpaw nga sai re majaw ya aten shinggan kaw Hka San bu hte dut nga ai lam makau hkan na seng hkan 1 liter kaw 8,000 kaw na 10,000 mi lapran manu hkrat mat ai re. Ngut nna Sau Pump seng hkan gaw ya dai ni July shata praw (9) ya Shana maga de na gaw 1 liter kaw 4,600 kaw na 4,800 lapran dut jaw nga sai lam chye lu ai.
Ya na zawn jak sau manu ni tsaw wa ai gaw Miwa mung jarit Kan Pai Ti hte Jinghpaw mung Sagaing jarit mayan Nam Si Awng gate ni pat da ai majaw re nga nna jak sau htaw shalai sha masha ni tsun ai kaw na chye lu ai.
Comments