Pajau Media Channel
9th July, 2024
Putao ginra hkrun lam hpaw ai hte jahkring da ai Ja Maw ni bai hpaw wa ai majaw Putao ginra kata jak sau manu ni bai rawt nga sai lam ginra masha ni tsun ai.
July praw laman marang matut manoi htu sawng ai majaw Myitkyina-Putao hkawm sa hkrun lam gyi ru hten za mat sai re, dai majaw putao ginra hta gunrai, jak sau manu ni gaw lam pat ai ten na zawn grai tsaw wa na hpe ginra masha ni myit tsang nga ma ai re.
“ dai ni pyi jak sau 1 liter kaw mun mali jan hte dut nga ai, sau seng ni yawng ngu na daram pat da sai, sau ma mat ai majaw nga tsun ai, lam kaw lung wa ai gunrai htaw mawdaw ni, sau htaw mawdaw ni mung chyat taw sai, jak sau manu ni kalang ta tsaw wa ai ngu ma Ja maw ni a majaw re, shanhte sha shang wa ai jak sau yawng hpe mari kau ai, Sumpra Bum du hkra du nga sai mawdaw ni lung wa sai, Sau mawdaw mung kru (6) daram lawm ai raitim myo de n du ai, ja maw de kalang ta wa jahkrat ya” nga nna Putao ginra jak sau dut mari hpaga galaw nga ai mung masha langai tsun ai.
Majan a majaw mawdaw hkrun lam pat da ai shata masum jan laman pat da ai ja maw ni yawng mawdaw hkrun lam bai hpaw wa ai June shata ka-ang kaw nna kalang bai hpaw nna jaw maw ni yawng bai hpaw wa ai majaw ginra kata gunrai manu ni gaw ya du hkra lung nga dingyang re hpe mung chye lu ai.
Marang ladu lai htu sawng ai majaw Putao-Myitkyina, Putao-Hkawng Lang Hpu hkawm sa hkrun lam ni gyi ru hten za mat ai majaw hkawm sa hkawm wa grai yak hkak nga ai re hpe mung chye lu ai. ya aten marang matut manoi naw htu nga ai re majaw putao ginra kata lanam ladaw grai yak hkak wa na hpe mung masha ni myit tsang nga ma ai re.
Shiga – Mali Hku
Comments