Pajau Media
29.11.2024
Putao Kawng Kahtawng kaw Ja Joi 300 hkawt damya mya la mat wa ai damya ni gaw ya aten du hkra hprawng lawt nga ai hte Damya hpe lu rim sagawn ai hta yawng chyawm shang lawm garum na matu Lit nga ginra balik hpung ni hte seng madu ni kawn n dau laika shapraw hkan sagawn nga dingyang re lam chye lu ai.
N dau laika hta hprawng lawt nga ai damya ni hte seng nna teng man ai shiga shana ya lu ai rai yang Gumhpraw sen (100) shagrau sa wa na lam, Lawm mat ai Ja ni hte hpawn lu rim ai rai Yang Sen (1,000) shagrau sa wa na re lam n dau da ai re hpe mung chye lu ai.
Putao ginra kaw shawng de ya na zawn damya Manghkang gaw n nga ai daram re, Myen mungdan masa grau grau shuk shanut wa ai hpang kaw nna Putao ginra kata de shara shagu hkan na Ja htu manam ni law wa ai hta ka-ni nanghpam Jai lang lu sha masha ni mung grau grau law wa ai majaw Ya na zawn lagut damya manghkang ni nga wa ai re. Putao ginra kata hta Mung hkawm sa hkawm wa kaw na hkawt grai sadi maja ra sai lam ginra masha ni tsun ai re.
Lai wa sai November 24 ya shani ဇမ္မုရာစ် Ja seng madu gaw seng de sa na matu Mawdaw kaw arai ni shajin da nna seng de sa hkyen yang nta kata kaw arai malap ai majaw gan wa la nga ai aten Mawdaw gawt hprawng mat wa ai lam, hpang shani Mawdaw hpe gaw lu la ai raitim Ja hte gumhpraw ni n lu la mat ai re lam chye lu ai.
Ya Aten Dai damya ni hpe lu rim hkra yawng chyawm garum la na hte ndau laika ni hkan shabra nna matut manoi hkan tam sagawn nga dingyang re lam Putao ginra masha ni tsun ai kaw na chye lu ai.
Comments