Pajau Media
26 February 2025
Jinghpaw mungdaw Myitkyina-Mandalay lam maw ntsa kaw nga ai Shwegu muklum hta myen hpyen dap ni kawn ndai laman Y-12 nbungli hte jahkring hkring sa gayin yu nga nna ja htu ai shara de nbungli hte htim gasat ai lam ni galaw nga ai hpe chye lu ai.
Lai wa sai February 23 ya shani ka-ang hkying 11 jan aten hta mung Shwegu muklum Andawshin hpara (အံတော်ရှင်ဘုရား) hpang Mali Hka hta ja htu taw ai masha ni hpe nbungli hte mara kata gap gasat ai lam galaw ai hpe chye lu ai.
Mung masha langai mi gaw “Laga shara hkan htu taw ai masha ni hpe mung gap na ngu tsun ai, ya shanhte gaw dingsang mung masha ni galaw sha taw ai hpe KIA ni hpe karum taw ai ngu tsun na sa gap ai re,” nga nna tsun dan ai re.
Dai gap gasat wa ai gaw Y-12 nbungli hte sa gap ai rai nna 37 lang hta nyawm bawm sa jahkrat bun ai re majaw masha marai 7 hrka hkala machyi ai hte ja htu jak ni mung bawm hkra hten mat ai lam chye lu ai.
Dai shaloi kaw na Mali Hka hta ja htu taw ai masha ni hte jak ni yawng jahkring da ai hta sha n-ga Shwegu muklum kata nbungli hte sa ga-wan yu ai mung jahkring hkring nga ai re hte myen hpyen dap ni kawn bai sa du gap gasat na re hpe mung shana da ai nga nna tsun ai re.
Myen hpyen dap ni kawn mani shani ka-ang hkying 2 laman hta mung Suicide drone 3 hte Laiza hpe htim gasat mat ai rai nna Laiza ginra makau drone 2 du sa ai raitim hkra hkala hkrum ai masha nnga ai re hpe chye lu ai.
Ndai laman Jinghpaw mungdaw hta myen hpyen dap ni kawn majan nnga ai shara ni hta mara kata nbungli, drone ni hte sa gap ai ni jahkring hkring galaw nga ai re majaw mung masha ni si hkala ai hte dum nta arai ni wan hkru ai ni law law nga wa ai hpe mung masha ni kawn chye lu ai.
Shiga – Zau Mai
Commentaires