Pajau Media
20th January, 2025
Putao Ginra, Lung Sha Yang makau Lung Sha hkashi hta Ja htu sa wa na masing hpe ninghkap ai ginra masha ni hpe KIA Masat (1) Dap ba kawn bawngban jahkrup na matu shaga ai majaw ginra masha marai (46) gaw Dap ba ginjaw de sa du nga ai lam chye lu ai.
“Ndai kalang gaw grai nan sawng ai hku re. Jak kaba ni hte bungli madu grai law hkra bai du wa ai. Dai hpe ginra masha ni, mare salang ni, Nawku hpung ni, komiti salang ni ninghkap laika mara dat ai. Dai ninghkap laika hta lawm ai yawng hpe KIA Dap ba (1) ginjaw de sa wa na matu shaga ai. Moi kalang mi hkrum shaga ai shaloi mung shanhte kaw na nmai ninghkap ai lam, tsun wa ai. Dai majaw laika bai bang dat ai re. Dai hpe shaga laika du wa ai. Ginra masha ni mung mayak law law kaw na yawng (46) gaw sa wa masai,” nga nna Lung Sha Yang ginra salang langai tsun ai re.
Lai wa sai shaning htum aten hta Ja htu sha na masing hpe laja lana galaw wa ai majaw ginra masha ni, mare salang ni, hpung woi ni hte Lung Sha Hkashi Makawp Maga Komiti hpung ni yawng ninghkap ai lam laika hpe masat (1)Dap ba ginjaw de bang dat ai re lam chye lu ai.
Dai hpang, January shata nhtoi 17 ya shani hta masat (1) Dap ba kawn ninghkap masat lekmat htu lawm ai yawng hpe ginjaw ginra de nlung nmai shaga ai majaw ginra masha marai (46) gaw ginjaw ginra de sa du nga sai re.
“KIA masat (1) Dap ba ginjaw kawn hpa ni tsun dat na kun gaw nchye ai. KIA masat (1) Dap ba kata na nkau kaba ai ni mung dai Ja htu sha na masing kaw lawm ai ngu maram lu ai. Shanhte gaw War Fund (majan jarik) na matu galaw ai magam bungli hpe nmai ninghkap ai nga nna tsun taw ai,” nga nna lahta na salang wa tsun dan ai.
Ya aten ginra masha marai (46) gaw Ja htu sha ai masing hpe bawng ban jahkrup jahkring lu na matu ginjaw ginra hta du nga sai rai nna, kaning re mahtai la wa lu na hpe gaw nchye lu shi ai re.
Ginra masha ni mung ninghkap ai lam hpe lahkawng ning jan hkra ninghkap nga ding yang rai nna, kaning re ai mabyin masa hta raitim, jahkring kau lu hkra galaw sa wa na rai nhtawm Lung Sha hkashi gaw ginra masha ni a matu grai manu dan ai shara langai re hpe mung tsun dan ai.
“Anhte maga kawn gara hku mung ahkang nmai jaw na re. Hpa majaw nga yang Lung Sha Yang kata na mung masha 5000 jan gaw ndai hka hpe sha machyu let, sun hkauna galaw sha ai. Lu hka, wan lang yawng a matu akyu jashawn ai re majaw makawp maga taw ai re. Dai hpe Ja htu sha kau yang gaw hka hkyet mat na hpe tsang ai majaw ning hkap ai re,” nga nna kaga salang langai mung tsun ai re.
Lung Sha hkashi kaw ja htu sa wa na masing hpe ginra masha ni ninghkap nga ai gaw lahkawng ning jan du wa sai rai nna, ginra masha ni kawn seng ang ai Asuya hpang de lai wa sai shaning November shata hta mung laika bang hpyi shawn lai wa sai re hpe matut chye lu ai.
Shiga – Malihku
Comments