Pajau Media Channel
Internet n lu ai manghkang a majaw Chipwi ginra nga hpyen yen mung masha ni garum ningtum gumhpraw nlu la ai shata mi jan nga sai re lam ginra masha ni tsun ai kaw na chye lu ai.
Internet ph line ni pat nga ai aten ginra n kau hta gaw kaga sim card ni n mai tim, Telenor ph line gaw mai lang ai re, raitim Chipwi ginra de gaw gara line mung atsawm nlu rai nna grai yak nga ai lam, dai ginra nga hpyen yen mung masha ni gaw garum ningtum gumhpraw ni hpe online gumhpraw shalai masing hku nna shalai la re, Internet n lu ai majaw garum gumhpraw n lu la ai, shata mi jan nga sai lam ginra masha langai tsun ai. “Anhte gaw garum ningtum hpung ni garum jaw ai gumhpraw hte she Ma ni a hpaji lam hte n ta dinghku mayak hpe hparan ai re, shawoi shata hkan gaw n htoi (20) ya nga ai hte garum gumhpraw lu sai ya gaw internet nlu ai majaw hpa mung nlu htuk la ai, aten na wa yang gara hku rai na ngu ai hpe myit tsang ai” lam tsun dan ai re.
Chipwi ginra de hpyen yen camp (1,2) nga ai rai nna Mung masha (1,500) nga ai re, garum ningtum hku nna gaw lai wa sai ten hta Maigan garum ningtum ni, Mungdan kata na shinggyim nau na garum hpung ni kawn mung garum ai lam ni nga ai re, raitim Mungdan masa lam a majaw hpyen mung masha ni mung lani hte lani law wa ai hte maren shara shagu de garum ningtum jaw ra ai lam ni law wa ai majaw kaga maigan garum ningtum ni ram ram yawm mat ai lam mung chye lu ai.
Ya aten World Vision hpung ni hku nna madung garum nga ai rai nna yak ai dinghku hpe marai (1) hta Mun Lahkawng hkying manga (25,000) hte loi tsamai ai ni hpe (20,000) hku nna garum jaw nga ai re hte garum Gumhpraw hpe online gumhpraw shalai masing hte shalai la ai re, Internet nlu ai majaw garum gumhpraw nlu mat ai shata mi jan nga sai lam mung chye lu ai.
Comments