Indaw Gyi Ginra Na Ja Htu Bungli Galaw Ai Ni Hpe Myen Hpyen Dap Kawn A-Hkun Hta Jat Ai Lam

Pajau Media

11 / Dec / 2024

Indaw Gyi ginra Mamung Kai mare na Ja Htu bungli madu ni hpe myen hpyen dap kawn October shata kaw na hpang nna a-hkun hta ai hpe shawoi nah ta grau nna hta jat ai lam Ja htu sha masha ni tsun ai kaw na chye lu ai.

Shawng daw hta Ja htu n-hkun langai mi kaw Ja Kaja nrai shi ai Lap mi hte shata mi hta Sen (15) jaw ra ai hpe October shata kaw na Ja htu nhkun langai mi hta ju ngut sai Ja kaja lap 3 hte nhkun langai hta sen (300) jat nna bai hta nga ai sha n-ga Excavator mawdaw langai hta seng (5) bai hta jat taw lam hpe bungli madu langai tsun dan ai re.

Hunda Jak kaji ni hte htu sha ai ni mung shawng daw de shata mi kaw Sen (5) jaw ra ai kaw na ya gaw Sen (15) bai gahtap jaw ra ai lam hpe Mamung Kai mare masha in tsun ai .

Mamung Kai mare kaw jak kaba ni lang na htu taw nga ai Ja nhkun yawng pawng (200) jan nga nna Hunda jak hte lwi hkrat ai Ja lwi bungli madu ni pawng (300) jan nga ai.

Lai wa sai September shata htum ai hta Mung bungli madu n kau gaw Mamung Kai mare na Hkauna Eka mi hpe seng (3500) hte Eka (10) mari ai lam nga lai wa sai hpe Mamung Kai mare uphkang salang ni hte ni gahtep ai ni tsun ai kaw na chye lu ai.

Mamung Kai Mare kaw Ja htu bungli madu ni gaw Ja htu na matu hkauna Eka mi hta sen (3500) kaw na sen (5000) du hkra jaw n htawm ja htu shara lamu ga ni mari nga ai lam mung masha ni tsun dan ai re.

Daru magam zing ngut ai hpang Indaw Gyi ginra hta jak kaba ni hte tara nshang htu wa ai hpe grau nna galaw wa nna Mai Nau mare kaw na Mamung Kai mare du hkra gashun gashe Ja htu sha wa ai lam ginra masha ni tsun ai kaw na chye lu ai.