Pajau Media Channel
27th January, 2024
Myen hpyen dap uphkang wa ai hpang kaw nna Indaw Gyi ginra hta lagu lagyim rai Ja htu sha ai lam grai galaw wa ai re hte ja htu sha ahkang hpe Myen hpyen dap kaw nna nan ahkang jaw da ai re majaw ja htu sha ai lam hte seng nna tsun shaga wa ai masha ni hpe sanat gap aming jahkrat da ai re lam ginra masha ni tsun ai kaw na chye lu ai.
“Ja nhkun lau ban wa kawn n hkun ningbaw wa hpe tsun da ai lam nga ai, anhte Ja htu sha nga ai lam hpe Online n tsa kaw sumla bra mat ai lam n byin hkra galaw ra ai, n hkun makau de sumla wa gayet ai kadai hpe raitim sanant gap sat kau mu, anhte hpe ja htu ahkang jaw da ai ni nan mung aming jaw da chay lu re ” nga nna matsun nga ai lam hkawng ma langai tsun dan re ai re.
Dai ginra hta ja htu magam bungli galaw nga ai ni hpe Mobile Phone jai lang ahkang mung pat tawn da ai re lam, Ja htu ai lam ni hte seng nna ninghkap tsun shaga ai mung masha marai (3) mung koi yen hkawm ra ai re hpe mung chye lu ai.
“Ja htu ai lam hpe ninghkap ai mung masha marai (3) mung hprawng koi yen hkawm taw nga, hpa majaw nga yang Mung masha ni ninghkap ai shara kaw Ja htu ahkang jaw da ai gaw lak nak lu ai hpung ni re majaw hpa mung n mai tsun,” nga nna asak (60) ning re ai salang langai tsun da ai re hpe mung chye lu ai.
N dai laman Indaw Gyi ginra hta Myen hpyen dap hte P.T.Ts hpung ni hpyen shamu shamawt lam ni dingyang galaw nga ai aten maga mi de mung Ja htu ai magam bungli hpe mung dam lada ai hku matut manoi galaw nga ai re lam mung chye lu ai. Ja htu ai lam hte seng nna Mung shawa ni gaw n ra sharawng ai, tara shang galaw sha ai lam n re, lak nak hpe kam hpa nna shanhte kam ai hku galaw sha nga ai hpe mung shawa ni gaw n ra sharawng ai raitim tsun shaga n mai, hkrit tsang let nga ra ai lam ginra masha ni tsun ai kaw na chye lu ai.
Shiga -Kachin Pyi Tar
Comments