Pajau Media Channel
April 29, 2024
Jinghpaw mung Mohnyin, Indaw Gyi ginra hta lai wa sai April 23 ya shani jahpawt daw hta Myen hpyen dap hte pawng hpawm nna hpaga ga sha ai amyu shayi langai hpe mying n chye lu ai lak nak lang hpung ni kawn rim kau sai re hte dai ni aten du hkra matut mahkai n lu ai lam ginra masha ni tsun ai re.
“ shi gaw Jak sau hpaga ga ai re, Myen hpyen dap hpe mung ni htep ai hku tsun shaga hku hkau ai masha re, jak sau ni hpe ja maw de shalai sha, bawm hte seng ai zawn re ai ni dut shalai ai lam hpe myen hpyen dap hte pawng nna galaw ai, jep joi shara hkan dung nna ahkun hkan se hta sha ai, Myen hpyen dap hpe grai hku hkau ai masa re” hpe mung chye lu ai.
Rim hkrum ai amyu shayi gaw lai wa sai April 23 shani Nam Mun Gat kaw gat mari nga ai aten rim hkrum ai re lam, rim hkrum ai shani kaw nna ya aten du hkra matut mahkai n lu mat ai lam ni nawn ai jinghku ni tsun ai kaw na chye lu ai.
Ginra masha ni tsun ai hta dai amyu shayi gaw Myen mungdan hpe myen hpyen dap zing madu ai hpang kaw nna Indaw gyi ginra mayan ja maw shara shagu de Jak sau hpe htaw shalai sha ai daju mung re hte Myen hpyen dap hte hpaga pawng galaw ai re hpe mung chye lu ai. Rim woi mat ai lak nak lang hpung ni gaw gara hpung ni re ngu hpe mung tup hkrak n chye lu ai re lam mung ginra masha ni tsun ai.
Shiga- Kachyin Pyi Tar
Comments