Indaw Gyi Ginra Hta Ja Maw Law Wa Ai Hte Maren Ka-ni Nanghpam Jai Lang Masa Mung Grau Law Wa

Pajau Media Channel

1st February, 2024

Indaw Gyi ginra mayan Ma Mung Kai mare makau mayan ja htu sha ai lam dam lada ai hku galaw wa ai hte maren ka-ni nanghpam jai lang ai lam ni mung grai dam lada wa ai re lam chye lu ai.

Ja htu lauban ni gaw tinang kaw bungli galaw ai hkawng ma ni hpe bungli manu malai ka-ni jaw ai, n kau lauban ni gaw shanhte nan mung ka-ni lu sha ai, n kau gaw tinang a hkawng ma ni hpe jaw na matu law law mari da ai lam ni nga ai majaw ka-ni nanghpam mayam tai ai ni lani hte lani law jat nga dingyang re nga nna Ma Mung Kai mare masha langai tsun ai re. “Hkawng ma ni ka-ni lu sha da yang bungli grai lu galaw ai, Lauban ni mung shanhte nan lu sha ai ni lawm ai, n kau chyawm hkawng ma ni hpe jaw na matu san san mari da ai lam nga ai, Ka-ni lu sha jai lang sai masha ni hpe sha law malawng bungli jaw ma ai, bungli manu malai Ka-ni jaw ai madang re” nga nna tsun ai.

Ma Mung Kai lam maw kaba hte kade ntsan ai shara kaw nga ai ja maw kaw bungli masha hkying mi jan daram nga ai re hte tsa lam shadang 70% daram gaw Ka-ni lu sha jai lang ai lam ginra masha matut tsun dan ai. “Ka-ni dut ai masha ni hte mari ai masha ni gaw lam makau kaw dut taw ai gat lawk hpa she re, dai majaw mare hkan na ramma ni law malawng mung ka-ni lu sha masha hkrai rai wa ai, Ja maw kaw bungli galaw na lu ai gumhpraw hte ka-ni bai mari lu ai ni mung nga ai, shana hkying matsat daram hta she bungli hkring ai, bungli hkring ai hte ka-ni bai tam lu mat re yang hpang shani bungli atsawm n lu shang ai dai majaw lauban ni gaw shanhte bungli masan sa na matu bungli shara kaw nan ka-ni law law mari da ai, hkawng ma ni gaw shanhte lu ai gumhpraw hte shanhte pyi n law lang, dum nta masha ni hpe madi shadaw na gaw hkum tsun sa ”.

Ma Mung Kai mare makau mayan kaw ka-ni sun kaba nga ai rai nna dai ka-ni sun hpe lai wa sai shaning hta mare uphkang rung hte lit nga ai ausya hpung ni pawng hpawm nna rim zing ai lam ni galaw lai wa sai raitim kade n na ai hpang kalang bai wang lu wang lang galaw wa ai re, ya aten dai ka-ni sun kaw ka-ni mari masha lani mi hta marai latsa grup yin pru pru shang shang rai wang lu wang lang dut mari nga ma ai re. Myen mungdan kata ya na zawn ka-ni dut hpaga lu sha jai lang masha lani hte lani law wa ai masa gaw lit nga ai mungdan asuya kaw nna nan mung atsawm lit la hparan ai lam n nga ai majaw Myen mungdan a shawng lam masa gaw grai myit tsang ra ai madang byin nga ai re hpe mung chye lu ai.

Shiga- Kachin Pyi Tar