Pajau Media Channel
18 February 2024
Myen asuya hpyen dap ni gaw Mungdan kata hpyen shamu shamawt lam, hpyen n-gun jat ai lam dingyang galaw nga ai re hte ndai laman Indaw Gyi ginra hta dap Jung nga ai myen hpyen dap kawn Maw Lu ginra hpe n dai laman zing madu na lam shiga ni mawng nga ai majaw dai ginra masha ni grai hkrit tsang nga ma ai lam chye lu ai.
Feb 16 ya shani hta mung Indaw Gyi ginra na hpyen n-gun (60) hte Na Pa ginra na hpyen n-gun (50) grup yin nga ai pawng hpawm hpyen hpung ni gaw Mung masha nga ai Mare makau mayan hkan shamu shamawt hkawm nga ai re lam ginra masha ni tsun ai.
Anhte gaw shana hkan nga yang nga hkwi hkawm ai aten Mawdaw mali hpring tup lai wa ai, mawdaw nsen na ai hkrit ai majaw wan ni yawng sat kau na la yu ai, Maw lu ginra hpe zing madu na nga ai shiga na taw ai mali ya ram gaw rai sai nga nna ginra masha ni tsun ai re.
Myen hpyen dap hpung ni gaw aten ntam Mung masha hte hpyen hpe ginhka ai lam n nga dingsa gasat nga ai re majaw grai hkrit tsang ai, Mung masha ni nga ai de mung dingyang ngu na daram sanat gap bun ai re majaw grai hkrit tsang ai.
Maw Lu maga de gaw PDF ni grai n-gun kaba ai re majaw Myen hpyen dap maga kawn mung sanat kaba jahkring hkring gap bun ai, dai majaw n dai ginra hta majan grai sawng wa na hpe mung hkrit tsang ai, lai wa sai kalang mung Mung masha hkala ai lam grai sawng mat ai majaw majan bai byin wa na hpe hkrit tsang ai nga nna Maw Lu ginra masha tsun ai.
Maw Lu ginra hpe lai wa sai 2023 Dec shata laman Myen hpyen dap hte PDF lapran gasat gala majan byin nna PDF hpung ni kawn zing madu la kau lu ai re, Myen hpyen hpung ni gaw Maw lu ginra hpe bai lu la hkra galaw na lam shiga ni grai mawng nga ai majaw Mung masha ni gaw grai hkrit tsang nga ma ai re lam chye lu ai.
Shiga - Kachin Pyi Tar
Comments