Htu Shadut Htim Gasat Masing Gan Jahkring Ai Lam Myen Hpyen Dap Kawn N Dau Da Tim Jinghpaw Mung Kata Lak Nak Kaba Matut Manoi Gap Bang Nga

Pajau Media

3.April.2025

Myen hpyen dap kawn ya aten Myen mungdan kata nnang nawn hpyen tsin yam hkrum sha nga ai aten htu shadut majan gasat ai lam hpe nhtoi 20 ya jahkring na lam n dau tawn ai raitim Jinghpaw mung ginra kata hpyen nbungli, Drone bawm jahkrat ai lam April 3 ya jahpawt daw du hkra galaw nga ai re hpe chye lu ai.

Myen mungdan kata byin hkrum nga ai nnang nawn tsin yam hkrum nga ai ni hpe karum lu na matu nga nna htu shadut htim gasat majan hpe April 2 ya shani kaw nna 22 ya du hkra n htoi 20 ya gan jahkring ai lam Myen hpyen dap maga kawn ndau da ai re.

Htu shadut majan masing jahkring ai lam ndau da ai raitim April 3 ya jahpawt daw hta sha Jinghpaw mung Waimaw Hk.L.Y 58 Lamyang ginra de lak nak kaba gap bang ai lam matut manoi galaw nga ai re hpe ginra masha ni kaw na chye lu ai.

Myen hpyen dap a ndau laika hte seng nna KIO asuya tsun ai hta Myen hpyen dap kawn ya na zawn ndau wa ai gaw nnang nawn hpyen tsin yam hkrum katut ai masha ni hpe karum shingtau na matu n dau ai re ngu chye na ai hte dai zawn sha KIO hku nna mung April 2 ya kaw nna 22 ya du hkra htu shadut htim gasat masing hpe jahkring ai lam ndau wa ai re.

Raitim Myen hpyen dap gaw Waimaw Lamyang Hk.L.Y 58 de htu shadut wa ai majaw KIA maga kawn hkap shingla ai hta lahkawng maga gasat gala majan byin ai lam ginra masha ni tsun ai.

Myen hpyen dap a ndau laika hta lawm ai lawng lam ni hpe Myen hpyen dap nan mung atsawm hkan nang hkan sa ra ai lam KIO maga tsun da ai raitim ta tut hta gaw Myen hpyen dap kawn hkan sa ai lam n nga ai sha htu shadut htim gasat ai lam matut manoi galaw nga ai re.

Shiga – Hpring