Htenza Nga Ai Myitkyina Danai Lido Lam Hpe Bai Gram Sharai Na Hpe Ra Sharawng Ai Lam Mawdaw La Ni Tsun

Pajau Media Channel

29th August, 2024

Jinghpaw mung Myitkyina-Danai Lido lam dingyang hta jepjoi shara ni law jat wa ai sha n-ga hkawm sa manu jaw ra ai lam law nga ai hta hkrun lam htenza ai shara ni hkan Na Htu Jak ni hte gang garawt nna she lai hkawm sa ra nga ai hta mare kahtawng hte ni nawn ai hkan sha gaw lit nga ai ni kawn gram sharai lam galaw ya na hpe ra sharawng ai lam mawdaw la ni tsun ai.

“Htenza ai hkrun lam ni hpe Na Htu Jak hte gang garawt la ra ai shara 10 jan daram nga ai, mare pru shang lam ni mare ka-ang hkan du hkra hten za nga ai re, dai hpe gram sharai ai lam n nga ai, hten ai lam hku Na Htu Jak ni hte gang garawt nna she lai hkawm nga ai, mare makau mayan hta hten za yang gaw lit nga ai salang ni kawn lit la ai hte jawm byeng yang kaja ai ngu mu mada ai, kaga shara hkan gaw n tsun mayu ai,” nga nna mawdaw la ni tsun ai.

Myitkyina-Danai du hkra jepjoi shagyit 12 daram nga ai rai nna jepjoi shara langai mi kaw yawm dik lap 20,000 kaw na tsaw dik 200,000 du hkra gumhpraw hta sha nga ai sha n-ga lam hten ai shara ni hkan mung Na Htu Jak hte gang garawt ra ai hta madaw kaji kaba hta hkan nna lap 30,000 kaw na 80,000, 100,000 du hkra bai jaw ra ai majaw mawdaw gau na pyi n loi wa ai madang byin nga sai nga nna mawdaw la ni tsun ai.

Mawdaw la ni tsun ai hta Myitkyina kawn Danai du hkra Na Htu Jak hte gang garawt la ra ai shara shi jan daram nga ai hpe lawan gram sharai na hpe ra sharawng nga ma ai re.

“Grau sawng wa ai gaw 1liter hka bu hpe 4,000 hte dut nga ma ai, gunrai taw ai majaw dut ai hpe gaw hpa n ngu mayu ai, hka htung kaw na hka hpe 0.6liter sha nga ai hka bu kaw bang na bu mi hpe 1,000 nga na dut sha ai gaw n byin ging ai, hka htung hka hpe du hkra dut sha wa ai sawng dik re,” nga nna mung mawdaw la tsun ai re.

Myitkyina-Danai hkrun lam gaw lai wa sai aten kaw nna hkrun lam yak hkak ai re sha n-ga lanam ladaw marang htu sawng ai majaw hkrun lam grau hten za nga ai re. Danai Lido lam lapran hkawm sa ai mawdaw la ni gaw Myitkyina kaw na Danai du hkra sha pyi sau manu mung lawm rai yang 3,000,000 daram hkrat ang ai re. Bai nhtang wa ai manu pyi n lawm shi ai, hkrun lam hten za ai majaw wa wa sa sa shi lahkawng ya daram na ai lam mung chye lu ai.