Pajau Media Channel
July 19, 2024
Dai ning na lanam shang ai hte marang ladu lai marang htu sawng ai majaw lam gyi, mahkrai hten za ai lam gaw shawoi shaning na hta sawng dik madang re hte ya aten du hkra Hkawng Lang Hpu hkrun lam n lu gram shi ai majaw hkawm sa hkrun lam naw yak nga ai lam ginra masha ni tsun ai.
Hkrun lam mayak a majaw dai ginra na Putao de jawng sa lung na jawng ma ni mung ya aten du hkra jawng de nlu du ai sha naw chyat nga ai re lam chye lu ai. Hkawng Lang Hpu Ginra kata na ma ni law malawng gaw lapran tsang madang kaw nna Putao, Machyang Baw lahta tsang jawng ni de jawng sa lung ma ai re raitim dai ning gaw hkrun lam mayak a majaw nlu sa shi ai lam tsun ai.
“Hkawng Lang Hpu hkrun lam gaw ya du hkra n mai hkawm shi ai. Ninggam gyi ru mat ai re majaw grai sawng mat ai. Nga Lung mare du hkra sha mai hkawm ai. Matut n mai hkawm mat sai. Lagaw lam hkawm na nga yang ( ya daram na mat na re. Jawng ma ni jawng n lu sa ma ai, dai ning gaw lanam htum du hkra n dai hku sha rai na masa nga ai,” nga nna Hkawng Lang Hpu ginra jawng sara langai tsun ai.
Hkawng Lang Hpu ginra hta hpaji madang hte seng nna lahta tsang jawng du hkra nga ai raitim hkawm sa hkawm wa hkrun lam grai yak hkak ai shara re majaw sharin sara ni nlu du ai sha n-ga sharin na jawng sara/num n law ai majaw jawng hpe atsawm nlu hpaw shi ai re lam mung chye lu ai.
Dai ning na hpaji ladaw hta ma ni a matu August shata praw du hkra jawng mying hkap la na matu galaw da ai raiitm ya aten du hkra jawng mying n lu wa bang ai ma ni law law naw re ai lam chye lu ai. Hkawng Lang Hpu ginra gaw Putao ginwang kata numbat lahkawng masha jahpan law dik ginra langai mung re hte hkawm sa hkrun lam tsan ai sha n-ga grai yak hkak ai ginra langai re hpe mung chye lu ai.
Shiga- Mali Hku
Comentarios