Hten Za Nga Ai Putao Hkrun Lam Hpe Gram Lajang Nga Dingyang Re Hte Jak Sau Htaw Mawdaw Kaba Ni Mung Lai Hpang Nga Sai

Pajau Media

18th September, 2024

Marang ladu lai htu sawng ai majaw lam hten za mat ai Myitkyina-Putao hkrun lam hpe hkyak hkyak mai hkawm sa na madang sha naw gram da ai re hte September praw kaw nna hkrun lam hkawm mawdaw kaji ni, jak sau htaw mawdaw ni mung lai hkawm nga sai lam ginra masha ni tsun ai.

“Ya gaw sau htaw mawdaw, hkrun lam hkawm mawdaw ni yawng mai lai sai le. Mawdaw kaba ni lai ai gaw September praw 5 ya daram kaw na rai sai, lam chyawm grai naw gram ra ai. Hpung Ing Hka kaw na Hkin Du ga du hkra rai yang kachyi chyi hten ai shara 50 daram nga ai, dai ni hpe ya aten mai lai na madang sha gram lajang da ai,” nga nna tsun ai re.

Hten za mat ai hkrun lam ni hte seng nna lit nga ai Shanglawt Asuya kawn lit la galaw nga dingyang rai nna marang htu sawng ai majaw lam chyen mi gyi ru mat ai shara ni mung lawm ai re. Lam chyen mi gyi mat ai shara ni hpe ga bai htu shara la nna galaw da ai re hte lam nawng gyi ru mat ai Su Yang Mare hkan gaw hpun kaba ni madi nna ga bai kaput shara n htawm mai lai hkra gram lajang da ai re lam mung tsun ai.

Hkrun lam hpe ngang kang ai hku bai gram lajang na matu Ginra Uphkang salang ni hkyen lajang nga ai re hte grau nna marang ladaw n htum shi ai re majaw lawan ladan galaw na matu mayak nga ai masa re nga nna mung lit nga ai salang langai tsun dan ai kaw na chye lu ai.

Putao hkrun lam hpe ya aten mai hkawm sa na madang sha galaw da ai re majaw mawdaw kaji ni wang lu wang lang mai hkawm sa nga sai raitim jak sau htaw mawdaw ni gaw jak sau Paper Pung 50 hta jan nna n shalai ai, ya na zawn galaw ai gaw hkrun lam hpe hkyak hkyak mai hkawm sa na matu sha gan galaw da ai majaw re hpe mung chye lu ai.

Myitkyina-Putao hkrun lam hpe lai wa sai March shata gasat gala majan a majaw shata masum daram pat da ai hpang June shata htum wa maga hta lahkawng maga myit hkrum ai hte gan hpaw ya ai re. Hkrun lam hpaw ai kade n na ai hpang July praw laman marang ladu lai htu sawng wa ai majaw hkrun lam gyi ru mat ai raitim September praw kaw nna gaw mawdaw kaji, kaba lai nga sai lam chye lu ai.

Matsing-sumla dingsa