Hpyen Yen Ni Koi Yen Nga Ai Nawng Hkying Ginra De Shimlam Grai Tsang Wa Ai Majaw Buga De N Htang Wa Ai Ni Law Wa Ai Lam

Pajau Media

9.1.2025

Hpyen yen Mung masha ni koi yen shanu nga ai Nawng hkying ginra de Myen hpyen dap N-gun jat shamu shamawt ai lam grau grau galaw wa ai majaw Majan laja wa na hpe myit tsang nna Hpyen yen n kau gaw Shanglawt uphkang ginra de N htang wa ai Mung masha law wa ai lam hpyen yen mung masha ni tsun ai kaw na chye lu ai.

Shawng daw de Nawng hkying ginra mayan gaw wang lu wang lang mai hkawm sa ai raitim 2024 December praw 1 kaw nna Myen hpyen dap ni gaw hpyen yen camp makau mayan hkan sha shamu shamawt nga ai majaw shimlum lam n lu ai, majan mung grau laja wa mai ai majaw Shang lawt uphkang ginra de wa na matu hkyen lajang ai ni law wa ai hte buga de n htang wa ai ni mung nga sai lam hpyen yen mung masha langai tsun ai.

“ ya gaw Myitkyina Laiza lam mayan hkan gaw simsa sai le, hpyen yen dabang kaw mung grai nga yak wa sai, Ya na masa hpe yu yang n dai de she majan grai laja wa na zawn re di grai Myit tsang ai, Ga Ra Yang hkan na ni n kau gaw December shata hkan pyi htinggaw (14) daram wa sai, Awng Mye tit hkan na n kau mung Shang lawt uphkang ginra de nta shap rawng yang mi rawng nga di wa hkyen ai ni law wa sai” nga nna hpyen yen mung masha ni tsun ai re.

Ya na zawn Nawng hkying ginra de Myen Hpyen dap shamu shamawt shang wa ai gaw November shata hta Gwi htu girna uphkang ai P.T.Ts ningbaw La Sang Awng n nga mat ai hpang kaw nna shara la shamu shamawt ai lam galaw wa ai re lam dai ginra masha ni tsun ai kaw na chye lu ai.

Myen hpyen dap gaw ya aten Nawng Hkying, Labang kahtawng mayan hkan shamu shamawt nga nna lai wa lai sa mung masha ni hpe jep shatsang ai lam ni galaw nga ai re hpe mung chye lu ai. 2024 March 7 ya kaw nna hpang ai majan a majaw Waimaw Ginra kata mare kahtawng (20) jan na mung masha ni gaw Nawng hkying ginra de koi yen wa ai re hte nawng hkying ginra kata ya aten Hpyen yen dabang (9) nga ai re hpe mung chye lu ai.

Jinghpaw mung kata na KIA pawng hpawm hpyen hpung ni hte Myen hpyen dap lapran gasat gala majan grai laja nga ai re hte 2025 shaning hta mung majan gaw matut laja wa mai ai sha n-ga Awng dang ai aten du hkra gasat shamyit sa wa na re majaw Mung masha ni mung hpyen masa sadi maja nga ra ai na lam KIA shiga magam dap lit hkam kawn mung tsun da ai re.

Shiga – Pyilan U