Pajau Media Channel
Myen Hpyen Dap gaw aten ntam shara n lata Mung masha ni nga ai ginra de lak nak kaba gap bang ai lam ni dingyang galaw nga ai re majaw ya aten Laiza ginra Hpaji Jawng nkau hta Lawu tsang daw na jawng ma ni hpe n lu hpaw sharin shi ai lam chye lu ai.
Laiza ginra de Oct praw (9) Mung Lai Hkyet hpyen yen Dabang htim gasat hkrum ai hpang kaw nna dai ginra de shani shagu ngu na daram hpyen N bungli gawai hkawm, aten ntam lak nak kaba gap ai lam ni a majaw sadi maja, N bungli koi yen hkawm ra ai madang byin mat ai hpang Hpaji jawng ni hpe mung yawng pat kau ra mat ai re, raitim n dai laman masa loi zim ai majaw dai ning na hpaji ladaw hpe shangut la lu na matu tsang kru kaw nna tsang shi du hkra hpe sha hpaw sharin nga ai re lam Laiza ginra na Jawng srn tsun ai.“ Mung masa gaw ganing re wa na re n chye, aten tup maja ra, masa hta hkan nna hpaw ai bat mi daram gaw rai sai, dai ning na hpaji ladaw hpe lu shangut hkra ngu myit hte hpaw taw ai masa sha re”
Mung Lai Hkyet dingsa gasat hkrum ai mabyin hpang Jawng ma ni yawng gaw Woi Chyai IDP Jawng kaw gahkyin da ai re hte yawng rai yang (145) re hpe mung chye lu ai. Lawu Tsang daw hpe gaw ya aten du hkra hpaw sharin ai lam n nga shi ai re, Masa hta hkan nna Lawu tsang ni hpe December praw kaw nna sharin sa wa na matu hkyen da ai lam chye lu ai. Mung masa a majaw shata mi jan daram pat tawn da ai laiza lahta tsang jawng hta lapran tsang daw ni hpe November (20) ya daram kaw nna hpaw sharin hpang nga sai re lam mung chye lu ai.
Laiza lahta tsang Jawng kaw nna Tsang shi ninggam hpe sharin nga ai Jawng ma ni hpe gaw ya aten na Mung masa a majaw Alen Bum lahta tsang jawng de gahkyin nna sharin nga ai re hte Mung masa shiga hta hkan nna Mi na laiza lahta tsang jawng de bai sharin na masing ni mung nga ai re hpe mung chye lu ai.Myen mungdan masa shuk shanut wa ai hpang kaw nna mungdan kata Hpaji sharin hkaja lam grai yak hkak mat ai hte Hpaji jawng ni n hpaw mat ai sha n-ga Myen hpyen dap uphkang ai kata hpaji n kam sharin ai myo mare kaba hkan na Jawng ma ni law malawng gaw KIO uphkang ginra de jawng sa lung ai ni law wa ai re.
Myen Hpyen Dap gaw aten ntam shara n lata sinant kaba gap bang ai, Nbungli bawm jahkrat bun ai lam ni majaw KIO uphkang ginra kata na hpaji sharin nga ai jawng ma ni mung shimlum lam n nga ai, hkrit tsang sadi maja let sha hpaji hpe mai byin ai masa hku sharin hkaja ra nga ai re lam chye lu ai.
Bình luận