Hpyen Koi Yen Ai Shata (4) Na Wa Sai Sumpyi Yang Mung Mare de nlu wa shi ai hte dabang kata Tsi mawan ra kadawn nga ai lam

Pajau Media

25th September, 2024

Gasat gala majan a majaw Sumpyi Yang mare masha ni hpyen koi yen ai shata (4) na wa sai raitim Mare kata Myen hpyen dap kawn shara la da ai re majaw ya aten du hkra kalang pyi n lu wa gawan ai lam hpyen koi yen mung masha ni tsun ai.

Mare kaw Myen hpyen dap shara la da ai re majaw wa na matu grai tsang ra ai hte yak tim yak ai hku dabang kaw naw nga shalai ra ai lam chye lu ai. n dai laman Dabang kata machyi makaw mung grai law nga ai hte du hkra ladaw a majaw Machyi makaw byin ai ni hpe dabang kata mai tsi ai raitim aten galu machyi ai ni hpe gaw Sumpra Bum hte Myitkyina de shalai nna tsi tsi hkamla ra ai lam hpyen yen mung masha tsun ai re.

“Ya hte gaw dabang kata kaji kaba yawng ngu na daram machyi mat ai, dabang kata kaw n lu tsi ai shat kan machyi ai ni, Pu Tai ga gadoi ra ai zawn re ai ni hpe gaw Sumpra Bum hte Myitkyina de shalai ra ai, grai yak mat ai ga re, n dai laman gaw loi tsamai wa sai,” nga nna tsun ai.

Sumpyi Yang mare kaw dap jung nga ai Myen hpyen dap gaw mare kata nga du sat yam nga ni hpe kam ai hku sat sha, Mam ni kam ai hku htu sha rai nna nga nga ai sha n-ga Sinat gap shangoi ai lam ni dingyang galaw nga ai majaw koi yen shata mali na wa sai raitim nta de kalang pyi nlu wa ai, dabang kaw sha yak tim yak ai hku nga shalai taw ai masa hpe matut tsun ai re.

“Madung gaw shat lu sha rai nga. Mare de malu masha wa la na matu mung mare kaw nan Myen hpyen dap shara la nga ai re majaw wa na matu n loi sai. Mare kaw gaw hpa pyi n nga na sai. Shanhte kam ai hku U, Wa, Dumsu ni hpe mung gap sha, Mam ni mung kam ai hku shaw sha, htu sha rai na nga ma ai. Kadai mung n gwi wa na nga taw ai ga rai nga,” nga nna dai mare lapran lai wa lai sa ni wa tsun dan ai hpe hpyen koi yen mung masha langai bai kahtap tsun dan ai re.

Hpyen n nan yen wa ai bat mi daram na ai hpang mare de n-gu malu masha wa la ai Mung masha marai 4 hpe mung Myen hpyen dap kawn rim zing da ai ya aten du hkra n dat ya ai re lam chye lu ai. Sumpyi Yang ginra kata Mung masha htingaw 300 hkawt nga ai rai nna dai htinggaw ni gaw mare kata hpyen masa grai shaja wa ai majaw nam de koi yen mat wa ma ai re.

Myen Hpyen dap gaw ya aten gasat gala majan laja ai ginra de hpyen n-gun jat shamu shamawt ai lam laja lana galaw nga ai hta Putao maga de mung hpyen n-gun jat shamu shamawt wa ai majaw kalang bai hpyen majan laja wa mai ai nga nna hpyen yen mung masha ni tsun ai re.