Pajau Media Channel
9th September, 2024
Jinghpaw Mung ginra kata Mung masa hpyen masa a majaw matut mahkai Phone line, hkrun lam ni grai yak hkak nga ai aten hpyen koi yen mung masha ni hpe garum ningtum jaw ai Uhpung Uhpawng ni mung yawm wa ai majaw ya aten hkrun lam yak hkak nga ai Putao ginwang kata na Hpung Ngai Yang hpyen yen dabang hta malu masha grai yak hkak wa nga ai lam chye lu ai.
Sumpra Bum ginra gasat gala majan hpang May shata daram kaw nna hpyen koi yen mat ai Mung masha ni hpe KIO Asuya kawn N-gu malu masha ni garum jaw ai lam nga ai raitim masha law ai dinghku ni hta malu masha n law sha ai, grau nna gaw dai ning laman Yi Sun n lu mat ai majaw garum jaw ai hta lai nna kaga n lu ai majaw grau yak hkak nga ai masa re lam dabang masha ni tsun ai re.
Hpyen yen mung masha ni gaw lai wa sai ten kaw nna Bum Yi hkyen sha na nga ai re, dai ning gaw Yi galaw na aten kajawng kaja hpyen koi yen ra mat ai re majaw Bum Yi n lu shangut ai Mung masha ni law nga ai re. Dai ning gaw malu masha grai yak hkak wa mai ai nga nna mung tsun ai re.
Ya aten Hpung Ngai Yang hpyen yen dabang hta malu masha grai yak hkak nga ai sha n-ga hpyen yen dabang kata jawng lung ram ai ma ni hpaji matut n di sharin lu na matu Lapran Tsang du hkra hpaji jawng hpe hpaw da lu sai raitim jawng gawk kata lang na arung arai hte sharin sara, saranum n law ai mayak ni naw nga ai re hpe mung chye lu ai. Hpung Ngai Yang hpyen yen dabang gaw Putao hte Sumpra Bum hkrun lam lapran kaw nga ai re hte Sumpyi Yang, Wa Dat, N Si Yang mare masha htinggaw 200 jan shanu nga ai dabang re hpe mung chye lu ai.
Commenti