Pajau Media
1.11.2024
Majan a majaw hpyen koi yen nga ai Hpung Ngai Yang hpyen yen dabang kata ka-ni lu sha ai ni hpe KIA kawn lit la nna dawn jasan ya ai lam galaw nga ai hpe hpyen yeMung masha ni kaw na chye lu ai.
KIO asuya kawn Wunpawng Mungdan kata ka-ni nanghpam lu sha dut shabra ai lam hkoi tsai mat hkra ngu ai masing kata ka-ni nanghpam Pat Jasan ai lam hpe ja ja ninghkap galaw nga ai kata hpyen yen dabang ni hkan mung ka-ni lu sha jai lang ai masha grai law wa ai majaw ya na zawn rim woi dawn jasan ai lam n-gun dat galaw wa ai re lam chye lu ai.
Hpyen yen dabang kata na ka-ni nanghpam jai lang ai masha ngu n tsen n hten ai ni, dut hpaga galaw ai ni yawng hpe rim woi mat ai hta n kau gaw nta masha yawng lu sha jai lang ai ni lawm ai hte amyu shayi mung lawm ai re nga nna hpyen yen Mung masha ni tsun ai. Rim woi hkrum ai kaw na jit jep yang n awng ai ni hte aten galu machyi masha ni hpe gaw bai dat ya ai lam mung chye lu ai.
October shata praw daram kaw nna Hpung Ngai Yang hpyen yen dabang kata ka-ni Lu sha ai masha ni hpe numdaw hte numdaw rim woi dawn jasan ya ai hta shawng na numdaw hta marai 30 daram nga ai hte numdaw lahkawng ngu na lang hta gaw marai 40 daram nga ai lam chye lu ai. Ka-ni nanghpam dawn jasan ai lam hpe Dap Ba (1) ginra KIO asuya kawn lit la nna Layen Bumrun mare kaw dawn dabang hpaw da ai re hpe mung chye lu ai.
Shiga - Zero
Comentários