Pajau Media
14th, February, 2025
Jinghpaw mung, Sumpra Bum muklum makau kaw nga ai Hpung Ngai Yang hpyen yên camp na ma ni hta lasa machyi ana kap bra law nga nna ma kaji yawng hta chyam bra nga ai lam hpyen yên masha ni tsun ai.
“Ya aten hta gaw ma ni hta machyi makaw byin ai lam grai law ai. Ma ni hta e hkum hte du ni gayin gaye nmai ai, lasa machyi ai zawn, du lasa kashai ai zawn rai na machyi ai gaw ya yang grai chyam bra ai, chyam bra ana langai zawn byin taw nga. Ya yang anhte na hpyen yên kaw hkyak hkyak karum n-tum ra kadawn nga ai gaw tsi mawan ni hte gumgai dingla ni hte ma kaji ni a matu n gun rawng ai malu masha ni rai nga,” nga nna Hpung Ngai Yang hpyen yen mung masha langai tsun ai re.
Hpung Ngai Yang hpyen yen dabang hta ma kaji kawn ramma ni du hkra dai lasa machyi ai anna chyam bra nga nna tsi mawan ra kadawn nga ai hte, lawan tsi tsi gawn lajang na matu ra kadawn nga ai lam tsun ai re.
Bai hpyen yen dabang hta lu hka hkyet wa ai majaw lu hka yak nga ai rai nna, hpyen yen ladaw na wa ai majaw moega (မိုးကာ) ginsum hte kawa shadaw ni mung tsam wa nga nna, nga na shara yak hkak nga ai lam mung tsun ai.
“Ya gaw, hpyen yen ladaw na wa ai majaw anhte rawng ai ginsum ni mung hten wa tsam wa, kawa ni mung tsam wa, moega(မိုးကာ) ni mung tsam wa, ndai grupyin hkan e hka ni hkyet wa, ya anhte hpyen yen ai kaw hka ni hkyet wa ai, ginsum ni mung kawa the sha gap da ai re majaw tsam na hten wa ai masa de rai nga sai,” nga nna tsun ai.
Hpung Ngai Yang hpyen yen dabang hta Sumpyi Yang, Ntsi Yang hte Wa Dat mare kaw na mare masha hkying mi jan shanu nga ai rai nna, lai wa sai May shata 11, 2024 ning hta hpyen yen wa ai re hpe chye lu ai.
Masha hkying mi jan nga ai hpyen yên hkan e chyam bra anna jahkring hkring byin nga na, Waingmaw Labang Kahtawng hpyen yen dabang hta mung sumbram anna kap bra nga ai shata 5 rai wa sai lam mung chye lu ai.
Shiga - CJ
Commentaires