Pajau Media
28.10.2024
Pangwa Laksan Uphkang ginra htim gasat zing madu ai October 18 hpang kaw nna jarit mayan hpyen masa grai shaja hkat wa ai majaw Kanpaiti ginra masha hkying lam gaw Miwa jarit de koi yen mat ai hpe bai wa nga na matu Myen hpyen dap kawn tsun shadut ai lam ni nga ai lam ginra shiga ni hta tang madun da ai re.
Kanpaiti Mung masha hkying lam gaw hpyen koi yen ai n htoi shi jan ya daram rai wa sai hte Muklum ka-ang kaw Myen hpyen dap, P.T.Ts pawng hpawm hpung ni nga ai re majaw shimlum lam n lu ai, Myen hpyen dap kawn Mung masha ni hpe bai wa nga na matu tsun shadut ai raitim ya aten Kanpaiti ginra kata Myen hpyen dap kawn hpyen n-gun jat shamu shamawt nga dingyang re.
Pangwa Ginra hpe KIA pawng hpawm hpung ni zing madu ai hpang Kanpaiti ginra hpyen man yawng wa ai majaw dum nta kaw gumgai dingla nga ai ni, aachyi masha nga ai ni, nta sin masha hta lai nna n-gun ja ai ni yawng ngu na daram hprawng koi yen mat ai re hpe mung chye lu ai.
Hpyen koi yen Mung masha ni gaw n shung ladaw shang wa sai re majaw Mu Ga/plastic ginsum ni hte sha nga shara shimlum lam n nga ai raitim majan masa gaw naw sadi maja ra ai re majaw Muklum de n htang wa na lam n mai shi ai lam Mung masha ni tsun da ai re.
NDAK Laksan Uphkang ginra de lai wa sai September shata kaw nna gasat gala majan hpang wa ai rai nna Chihpwi muklum hpe October 1 ya shani zing madu la lu ai lam, Saw Law hpe praw 2 ya shani, hte Pangwa muklum kaba hpe October 18 ya shani KIA pawngh pawm hpung ni zing madu la lu sai re hte Kanpaiti Muklum hpe shimlam la ya nga ai 1003 Dap hpe October 21 ya shani zing madu la ai hpang ya aten Kanpaiti ginra kata hpyen masa grai shaja hkat nga dingyang re lam chye lu ai.
Comentários