Pajau Media
30.1.2025
KIO uphkang ginra rai nga ai Miwa jarit Hpare hpyen yen dabang hta hpyen koi yen aten ladaw na wa sai hte maren dum nta nga shara ni gaw tsam ma wa nna shimlum lam n lu wa ai hte gram sharai gaw gap la na matu ra ahkyak nga ai lam Hpare hpyen yen mung masha ni tsun ai.
“Du hkra ladaw wa grai kashung katsi sawng ai shara re majaw hpyen yen dum nta ni tsam ai maga law wa sai. Dum nta shimlum lam n nga ai majaw lamu marang n bung ni n shim sai. Asak kaba sai gumgai dingla ni gaw hkam ja lam du hkra ahtu hkra wa ai,” nga nna hpyen yen mung masha langai tsun ai re.
Hpyen koi yen aten ladaw mung na wa sai re majaw tinang buga ginra de wa nga na matu galaw nga ai raitim gaw gap la ra ai lam ni law law naw nga ai hte buga wa nga na matu hkyen lajang la ra ai aten laman sha na malu masha kaw na hkawt naw yak nga ai majaw kalang ta buga de wa nga na matu yak hkak nga ai masa re hpe mung chye lu ai.
Hpare ginra hta gaw hkyen htat nna grai kashung ai ginra re sha n-ga hkawm sa hkrun lam mung yak hkak ai ginra re. Dai ginra nga mung masha ni gaw bum yi galaw nna Yang Yi, Mawau Si, Hkai Nu, Bu Hkrawp Si ni hpe hkai shadut nna nta dinghku kata mayak hpe hparan nga ma ai re lam chye lu ai.
Hpare hpyen yen dabang gaw KIA Masat Shadaw (7) ginra rai nga ai Miwa mung jarit hkyen grai htat ai shara kaw rai nna mung masha htinggaw 300 jan shanu nga ai re. Hpyen yen mung masha ni gaw lai wa sai 2012 ning Myen hpyen dap hte KIA lapran byin ai gasat gala majan hta Myen hpyen dap kawn nbungli bawm ni wa jahkrat bun ai a majaw mare kahtawng 4 daram kaw nna Mung masha hkying mi jan hpyen koi yen shanu nga ai re hpe mung chye lu ai.
Hpyen koi yen aten ladaw na wa sai hte maren buga de bai n htang wa na matu lai wa sai 2019 daram kaw nna hkyen wa sai re hte 2025 ning laman hta gaw buga de bai wa lu hkra shakut nga ai lam hpyen koi yen mung masha ni tsun ai kaw na chye lu ai.
Shiga – Pyilan U
Comments